Türkmen döwlet binagärlik-gurluşyk institutynda “aýnanyň we sitallaryň himiki tehnologiýasy” täze hünär boýunça işgärler taýýarlanyp başlanylar.

Bu hünär boýunça okadylyp başlanylmagy Türkmenistanyň Senagat ministrliginiň işgärleri bolan islegleri, has takygy, Ahal welaýatynyň Derweze etrabynda gurulýan aýna we aýna önümleri kärhanasynyň işgärlere bolan zerurlyklary bilen şertlenendir. Ahal welaýatynyň ýaşlaryň wekilleri “aýnanyň we sitallaryň himiki tehnologiýasy” hünärini özleşdirmekde ilkinjiler boldular.

Umumy alnanda, bu binagärlik-gurluşyk institutynyň talyplary sekiz ugurda—himiýa tehnologiýasy; kompýuter tehnologiýasy; gurluşyk we binagärlik; tehnologiýa maşynlary we enjamlary; energetika; ykdysadyýet we pudagyň kärhanalaryny dolandyrmak; menejment; dizaýn boýunça jemi 28 hünäri özleşdirerler.

Okuw işleri geljekki hünärmenleriň gönüden-göni önümçilikde tejribe geçip, hünärlerini kämilleşdirmegi, öňi bilen bolsa kärhanalaryň işini guramak bilen baglanyşykly ukyplaryny artdyrmaklary bilen utgaşdyrylyp alnyp barylýar. Bu ýokary okuw mekdebiniň özi hem talyplaryň alan bilimini tejribede özleşdirmekleri üçin ajaýyp önümçilik binýadyna eýedir. Ýakynda, giriş synaglarynyň öňýanynda institutyň türkmen-hindi okuw-önümçilik merkezi döwrebaplaşdyrylandan we täzeden enjamlaşdyrylandan soň bütinleý başga keşbe girdi.