Türkmenistanly paralimpiýaçylar 2022-nji ýylyň 9 – 15-nji oktýabry aralygynda Hytaý Honçžounda geçriljek IV Aziýa paralimpiýa oýunlaryna gatnaşarlar. Bu oýunlaryň Guramaçylyk komitetinden Türkmenistanyň Milli paralimpiýa komiteitne (TMPK) degişli resmi çakylyk gelip gowuşdy.
Sportuň 22 görnüşi boýunça bäsleşikler geçiriljek Aziýa paralimpiýa oýunlaryna 45 döwletden beden mümkinçiligi çäkli türgenleriň gatnaşmagyna garaşylýar.
TMPK-nyň baş direktory Ýusup Jafarowyň «AA»-nyň habarçysyna aýtmagyna görä, ildeşlerimiz geljekki Aziýa paralimpiýa oýunlarynda iki ugurdan – parapauerliftingde we paraatletiakda çykyş ederler.
Ýurdumyzyň paralimpiýaçylar TMPK 2010-njy ýylda Aziýa paralimpiýa komitetine doly derejeli agzalyga kabul edilenden bäri Aziýa paralimpiýa oýunlaryna yzygiderli gatnaşyp gelýärler. 2010-njy ýyldan 2018-nji ýyllar aralygynda ildeşlerimiz geçen üç Oýunlarda jemi alty medaly mynasyp boldular. Olardan Sergeý Meladze (Guançžou-2010-da – bürünç, Inçhon-2014-de – kümüş we Jakarta-2018-de – bürünç), Maýagözel Ekeýewa (Guançžou – 2010-da – bürünç, Inçhon-2014-de – bürünç) we Walentina Simakowa (Inçhon-2014-de – kümüş) medala mynasyp boldular.
Türkmenistanyň Milli paralimpiýa komitetine geljekki ýaryşyň gurmaçylaryndan çakylyk bilen birlikde rowaýata görä bagt getirýän Feifei hytaý guşunyň nyşany, Hançžouda geçiriljek Aziýa paralimpiýa oýunlary-2022-niň tumary hem gelip gowuşdy.
