Aşgabatdan «Altyn täç» topary finalda Mary welaýatyndan «Olimp» toparyny 4:2 hasabynda utup, zenanlaryň arasynda futzal boýunça Türkmenistanyň Kubogyny eýeledi.

Bu toparlaryň ozal toparlaýyn tapgyrdaky özara duşuşygy 2:2 hasabynda deň tamamlanypdy.

Finala çenli beýleki oýunlarda «Altyn täç» öz toparynda «Daşoguzy» 11:1 we «Mirasy» (Lebap welayaty) 7:0 we ýarym finalda bolsa «Balkany» 13:0 hasabynda uly hasap bilen utdy.

Türkmenistanyň zenanlar milli futbol ýygyndysynyň baş tälimçisi Kamil Mingazow ýeňiji topary bu üstünlige ýetirdi.

«Ahal» topary ýaryşyň bürünç medalyna mynasyp boldy. Ozalky tanymal futbolçy Boris Borowigiň şägirtleri 3-nji orun ugrunda oýunda «Balkany» 2:1 hasabynda ýeňip, şu üstünlige ýetdi.

5-nji orun ugrunda oýunda Lebabyň «Mirasy» «Daşoguzdan» 6:4 hasabynda üstün çykdy, 7-nji orun ugrundaky oýunda «Aşgabat» Lebapdan «Nokat» topary 2:0 hasabynda ýeňdi.

Läle Haýypowa «Olimp» ýaryşyň iň gowy oýunçysy, Aýşa Annaberdiýewa «Altyn täç» iň gowy derwezebany diýlip ykrar edildi. «Altyn täç» toparyndan Mariýa Çaryýewa garşydaşlarynyň derwezesine 18 pökgi geçirip, ýokary netije gazandy. Iň güýçli emin baýragyna Guwanç Aşyrow mynasyp boldy.

Paýtagtymyzyň Olimpiýa şäherçesinde geçirilen zenanlaryň arasynda futsal boýunça Türkmenistanyň Kubogy ugrunda ýaryşa Aşgabat şäherine we ýurdumyzyň welaýatlarynyň ählisine wekilçilik edýän sekiz topar gatnaşdy.