«A» toparçanyň üçünji diwizionynda Keýptaunda (Günorta Afrikanyň Respublikasy) geçirilýän dünýä çempionatynda Türkmenistanyň milli ýygyndysynyň hokkeýçileri ilkinji ýeňşini gazandylar. Bäsleşigiň ikinji tapgyrynda ildeşlerimiz Lýuksemburgyň ýygyndy toparyndan 4:1 hasabynda üstün çykdylar.
Toparlaryň ikisi hem ýaryşa şowsuz başlady: birinji tapgyrda Türkmenistanyň milli ýygyndysy oýnuň birinji ýarymynda 3:0 hasabynda utup durka, GAR-yň toparyndan - 6:9 hasabynda ýeňildi, Lýuksemburgyň hokkeýçileri bolsa tailandly garşydaşlaryndan 2:10 hasabynda utuldy. Şonuň üçinem olaryň özara duşuşygynyň ähmiýeti uludy.
Ozal Türkmenistanyň we Lýuksemburgyň toparlary dünýä çempionatlarynda iki gezek duşuşypdylar. 2019-njy ýylda Türkmenistanyň türgenleri Sofiýada geçirilen dünýä çempionatynda 4:3 hasabynda utuş gazandylar, geçen ýyl bolsa lýuksemburglylar öz ýurdunda geçirilen dünýä çempionatynda, onda-da diňe goşmaça wagtda - 5:4 hasabynda üstün çykmana başardylar.
Bäsdeşleriň üçünji duşuşygynda Türkmenistanyň toparyndan oýnuň iň güýçli oýunçy diýlip ykrar edilen Arslan Nuryýew 9-njy minutda oýunçy artykmaçlygyndan ýerlikli peýdalanyp, hasaby açdy.
Ikinji döwürde, 29-njy minutda Pawel Barkowskiý hasaby artdyrdy. 32-nji minutda, Klod Mossong meýdançadan 2 minutlyk çykarylandan soň Lýuksemburgyň milli ýygyndysy ýene-de azlykda galanda Arslan Geldimyradow Amangeldi Aganyýazowyň derwezäniň öňüne beren şaýbasyny dürs urup, 3:0 hasaba ýetirdi.
33-nji minutyň ahyrynda Kolm Kennon Rahman Myradowyň derwezesiniň öňünde goragçymyzdan şaýbany alyp, hasaby 3:1 etdi.
Ikinji döwrüň tamamlanmagyna bir ýarym minut galanda Döwlet Hydyrow oýunçy artykmaçlygyndan peýdalandy, netijede toparlar 4:1 hasabynda Türkmenistanyň peýdasyna ikinji arakesmä çykdylar.
Soňky 20 minutda oýnuň netijesi üýtgemedi. Duşuşygyň ahyrynda hokkeýçilerimiziň ýeňşiniň hormatyna Keýptaun şäherindäki «Buz bekedinde» Türkmenistanyň gimni ýaňlandy.
Bu ýeňiş galan oýunlarda Lýuksemburgyň topary ýeňilen halatynda Türkmenistanyň milli ýygyndysyny üçünji bölümiň aşaky «B» toparyna düşmekden halas eder.
Keýptaun şäherinde geçirilýän dünýä çempionatynda Lýuksemburgyň, Tailandyň, Taýwanyň, Türkmenistanyň we GAR-yň ýygyndylary has güýçli ikinji «B» toparçanyň ikinji diwizionyna çykmak ugrunda göreşýärler.
Beýleki iki duşuşyk: Tailand - Taýwan - 2:11; Taýwan - GAR - 6:1 hasabynda tamamlandy.
Şeýlelik bilen, iki tapgyrdan soň Taýwan 100% netije - 6 utuk bilen çempionatda öňde barýar. Türkmenistanyň, Tailandyň we GAR-yň hersiniň 3 utugy bar. Entek utuk gazanmadyk Lýuksemburgyň ýygyndysy soňky orunda.
Indiki tapgyrda Baýram Allaýarowyň şägirtleri Tailandyň topary bilen duşuşarlar.
GAR-da geçirilýän dünýä çempionatynda 20 hokkeýçi Türkmenistanyň milli ýygyndysynyň hatarynda çykyş edýär, olaryň 18-si Içeri işler ministrliginiň «Galkan» klubynyň we 2-si Söwda we daşary ykdysady aragatnaşyklar ministrliginiň «Şir» klubynyň oýunçylarydyr.
