Türkmenistandan 6 ýaşly küştçi Begli Annagylyjow Gyrgyzystan Respublikasynda geçirilen Günbatar Aziýa çempionatynda bürünç medal gazandy.

Ýaryş Yssyk-Kölüň kenaryndaky Korumdu obasynda «Solemar Arenada» geçirildi. Oňa Bangladeşden, Hindistandan, Gazagystandan, Gyrgyz Respublikasyndan, Omandan, Şri-Lankadan, Täjigistandan, Türkmenistandan, Özbegistandan we Halkara küşt federasiýasynyň (FIDE) howandarlygynda 6-18 ýaş aralygyndaky 280-den gowrak ýaş küştçi gatnaşdy.

Çempionata gatnaşanlar küşdüň nusgawy, rapid (çalt) we blis (dessin) ugurlarynda baýraklar ugrunda bäsleşdiler.

Ildeşimiz Begli Annagylyjow iň ýaşajyk - 6 ýaşdan uly bolmadyk küştçüleriň arasynda bürünç medal gazandy. Ol 9 tapgyryň netijeleri boýunça 7 utuk toplap, diňe Gazagystandan iki türgenden - Madi Majitowdan (8 utuk) we Sanžar Rahymtaýdan (7,5 utuk) yza galdy.

Bu Begliniň gatnaşan ilkinji halkara ýaryşydy. Ol Aşgabadyň «Küşt Älemi» küşt klubunda beýleki zehinli küştçüler bilen birlikde tejribeli tälimçi we ýolbaşçy Gurbangeldi Amangeldiýewden tälim alýar.