Şu gün ХIХ tomusky Aziýa oýunlarynyň paýtagtyndaky Türgenler obasynyň halkara zolagynda ýerleşýän «Flag Plaza» alleýasynda türkmen sport wekiliýetini garşylamak we Türkmenistanyň Döwlet baýdagyny galdyrmak dabarasy geçirildi.

Çäräniň öňüsyrasy az-kem ýagyş ýagdy, ýöne ol baýramçylyk ruhuna täsir etmedi.

Şu ýylyň esasy sport ýaryşlarynda Watanymyza wekilçilik etmek hormatyna mynasyp bolan ýurdumyzyň wekillerini Aziýa oýunlarynyň Türgenler obasynyň baştutany jenap Lu Çunsýan mübärekledi we ol türkmenistanly türgenlere uly üstünlik we täze sepgitler arzuw etdi.

Türkmenistanyň Döwlet gimni ýaňlanýar. Mundan beýläk Aziýa oýunlary tamamlanýança Hançžouda ýurdumyzyň ýaşyl Baýdagy parlar. Dabaranyň ahyrynda taraplar ýadygärlik sowgatlar alyşdylar. Aziýa oýunlarynyň Türgenler obasynyň häkimine halkymyzyň milli baýlygy – türkmen halysy gowşuryldy.

Şu gün türkmen türgenleri bilen birlikde Makaonyň, Malaýziýanyň, Saud Arabystanynyň, Gündogar Timornyň we Wýetnamyň wekiliýetleri baýdak galdyrmak dabarasyna gatnaşdylar.

Aziýa oýunlarynyň guramaçylyk komitetiniň, Hytaýyň we dünýäniň beýleki ýurtlarynyň habar beriş serişdeleriniň wekilleri hem bu çärä gatnaşdylar.

Hançžou şäherindäki Aziýa oýunlarynyň Türgenler obasynda Türkmenistanyň Döwlet baýdagyny galdyrmak dabarasy hakyky baýramçylyga öwrüldi. Türkmen türgenlerini deprekleriň sesi astynda garşylaýan hytaýly artistleriň hyjuwly milli tansly ajaýyp çykyşy ony has-da baýlaşdyrdy.

Aziýa oýunlarynyň Türgenler obasynyň häkimi jenap Lu Çunsýan dabaranyň soňunda «Türkmenistan: Altyn asyr» elektron gazetiniň ýörite habarçysy bilen söhbetdeşlikde: «Türkmenistanyň toparynyň sport festiwalymyza gatnaşýandygyna örän şat. Oýunlarymyzy goldanyňyz üçin sag boluň. Türkmenistanyň toparyna «Hoş geldiňiz! » diýýäris we türkmen türgenleriniň bu ýerde özüni edil öz öýünde ýaly duýjakdyklaryny ynandyrýarys» diýdi.

Hançžou şäherinde geçiriljek Aziýa oýunlary entek açylmasa-da Türkmenistanyň türgenleri «Welcome Ceremonydan» soň Türgenler obasyndaky türgenlerimiziň taýýarlygy, ýaşaýşy we iýmit şertleri bilen gyzyklanýan ýerli KHBS-niň özüne aýratyn üns berýändiklerini duýdular.

Hançžou şäherinde geçiriljek Aziýa oýunlary 1994-nji ýylda Hirosimada (Ýaponiýa), 2002-nji ýylda Pusanda (Koreýa Respublikasy) we Guançžouda (Hytaý) geçirilen oýunlardan soň dördünji ýaryş bolar. Paýtagt bolmasa-da bu şäher Aziýa oýunlarynyň geçiriljek ýeri hökmünde saýlanyldy. Uly sport festiwaly Aziýa yklymynda ýaşaýan dürli medeniýetlerden we dinlerden bolan adamlary birleşdirer. Şonuň üçin hem ol Aziýa ýurtlarynyň arasyndaky baglanyşygy alamatlandyrmak üçin döredilen «Heart to Heart, @Future» «Ýürekden ýürege, @ Geljek» şygary astynda geçiriler.

Hançžou Aziýa oýunlarynyň guramaçylyk komitetiniň (HAGOC) habar bermegine görä, Aziýa oýunlarynyň taryhynda iň uly ýaryş bolan yklym ýaryşyna 45 ýurtdan 11 934 türgen gatnaşar. Öňki rekord 2018-nji ýylda Indoneziýada geçirilen XVIII tomusky Aziýa oýunlarynda 11 300 adamlydy.

3x3 basketbol, boks, erkin we grek-rim göreşi, jiu-jitsu, dzýudo, kuraş, karate, ýeňil atletika, suwda ýüzmek, agyr atletika we uşu boýunça dünýä, Aziýa çempionatlarynda we beýleki abraýly halkara ýaryşlaryndaky çykyşlarynda gazanan netijelerine görä saýlanyp alnan Türkmenistanyň iň güýçli türgenleri bu abraýly ýaryşda ýurdumyzyň abraýyny gorarlar.

Hançžou şäherinde geçiriljek Aziýa oýunlarynda Türkmenistanyň wekilleri ýurdumyzyň sport abraýyny has-da belende götermegi arzuw edýärler. Türkmenistanyň Prezidenti Serdar Berdimuhamedowyň we türkmen halkynyň Milli Lideri Gahryman Arkadagymyzyň Türkmenistanyň döwlet syýasaty derejesine çykarylan Olimpiýa hereketiniň mundan beýläk-de ösdürilmegine, köpçülikleýin bedenterbiýäniň we ýokary derejeli sportuň ösdürilmegine ýakyndan gatnaşmagy munuň üçin esas bolup durýar.

ХIХ tomusky Aziýa oýunlary 23-nji sentýabrda açyldy, ol 8-nji oktýabra çenli dowam eder.