Hytaýyň Hançžou şäherinde geçirilýän ХIХ tomusky Aziýa oýunlarynda boks ýaryşynyň soňky gününde türkmen türgeni Baýramdurdy Nurmuhammedowa bürünç medal gowşurylar. Ol 71 kilograma çenli agram derejesinde Indoneziýada geçirilen öňki Aziýa oýunlarynyň çärýek finalçysy Kan Çia Weý (Taýwan) bilen ýarym final bäsleşiginiň netijesi boýunça kesgitlenildi.

Häzirki Aziýa oýunlarynda boks diňe bir medallar bilen çäklenmän, eýsem, 2024-nji ýylda Parižde geçiriljek Olimpiýa oýunlaryna gatnaşmaga hukuk berýän sportuň dokuz görnüşiniň biridir. Şonuň üçin boks tutluşyklary aýratyn gyzyklanma döredýär.

Baýramdurdy Nurmuhammedow bilen ýeňiji Kan Çia Weiniň arasyndaky duşuşyk diňe bir finala çykman, eýsem, 2024-nji ýylda geçiriljek Olimpiýa oýunlaryna gatnaşmak üçin ygtyýarnama hem alýardy.

Duşuşykdan öň Hançžou şäherinde geçirilýän Aziýa oýunlarynda hünärmenleriň köpüsi türkmen boksçysy ýeňer diýýärdiler. Munuňam ýetik sebäbi bar. Ýaryşyň başynda Ýazmuhammet Pazzyýewden tälim alýan, asly Magtymguly şäherinden bolan 21 ýaşly türgenimiz 2023-nji ýylda Daşkentde geçirilen dünýä çempionatyna gatnaşan täjigistanly Dawud Mahkamowy 5:0 hasabynda ýeňdi. Soňky iki duşuşygy uly artykmaçlykda wagtyndan öň tamamlady, ol palestinaly Nidal Fokahaany we üçünji tutluşykda duşuşygy dowam etmekden ýüz öwüren güýçli mongol boksçusy Tuguldur Býambatsogty tehniki nokaut bilen ýeňdi.

Kan Çia Weý hem ýarym finala çenli üç tutluşyga gatnaşdy, şonda ol türgenimiz ýaly ynamly bolmasa-da, Rustambek ogly Nuradin (Gyrgyzystan), Niraja Galani Gamage (Şri-Lanka) we Bin Çe Azmi Mohd Aswan (Malaýziýa) ýaly boksçulary ýeňdi.

Birinji tutluşykda eminleriň bäşisem ýeňşi azajyk tapawutda - 10:9 hasabynda Taýwanyň wekiline berdiler. Ikinjisinde B.Nurmuhammedow has aýgytly hüjüme geçdi we garşydaşyny güýçli hüjümi hem-de gujurly urgylary bilen elesletdi. Daşyndan baksaň boksçular aldym-berdimli göreşýän ýalydy. Olimpiada gatnaşmaga hukuk güzaplydy. Beýle urgulara çydap bilmedik taýwanly türgen ýykylyp başlady. Şeýlelikde, ikinji raundda Germaniýadan we Slowakiýadan iki emin ýeňşi türkmenistanly türgene berdiler.

Jemleýji raundda Baýramdurdy hüjümini güýçlendirdi, Kan Çia Weýi üçünji gezek ýykyldy. Emin duşuşygy togtatdy we taýwanly türgeniň çapylan gaşyny gözden geçirmäge lukmançylyk gullugynyň wekilini çagyrdy. Lukman ilki Kan Çia Weýi, soňra B.Nurmuhammedowy gözden geçirip, duşuşygy dowam etmäge rugsat berdi.

Türkmen boksçysy söweşi wagtyndan öň tamamlajak bolup, hüjümini dowam etdirýär. Söweşiň tamamlanmagyna 1 minut 11 sekunt galanda ringdäki emin latwiýaly Leonid Hanewiç ýene-de lukmançylyk gullugynyň wekilini çagyrdy. Ol Kan Çia Weýi gözden geçirip, duşuşygy dowam etmäge rugsat bermedi.

Şonda bu duşuşykda ýeňiş we Olimpiýa oýunlaryna gatnaşmaga hukuk eýýäm B.Nurmuhammedowyňky ýalydy. Emma ýagdaý düýpgöter başgaça boldy. Biraz salymdan ringdäki emin Kan Çia Weýiň elini galdyrdy, netijede Taýwanyň wekili söweşiň ýeňijisi diýlip yglan edildi. Soň belli bolşy ýaly, tamamlanmadyk üçünji raundda türkmen boksçysyna - 3:2 hasabynda ýeňiş beren eminler üç tapgyryň netijelerine esaslanyp, onuň garşydaşy 4:1 hasabynda ýeňdi diýen netijä geldiler.

Hançžou şäherinde geçirilýän Aziýa oýunlarynda sportuň beýleki görnüşleri boýunça hem ýaryşlar dowam edýär.

Agyr atletika ýaryşynda Bunýad Raşidow (agramy 67 kg çenli) jemi 298 kg (silterläp - 140 kg, itekläp - 158 kg) netije bilen 16 türgeniň arasynda ilkinji altylyga düşdi. Bektimur Reýimow (73 kg çenli) jemi 312 kg (silterläp - 142 kg, itekläp - 170 kg) netije bilen 14 agyr atletikaçynyň arasynda 9-njy orny eýeledi.

Ýeňil atletika ýaryşynda Jennet Muhamowa iň gowy synanyşygynda naýzany 47,73 metr zyňyp, 11-nji orny eýeledi.

Şu gün Hançžou şäherinde geçirilýän Aziýa oýunlarynda grek-rim göreşi boýunça ýaryş başlandy. Sportuň şu görnüşinde bäş türgen Türkmenistana wekilçilik edýär. Olaryň üçüsi - Arslanbek Zakirbaýew (60 kg çenli), Mansur Nurberdiýew (67 kilograma çenli) we Azym Annamämmedow (87 kg çenli) ýaryşy eýýäm tamamladylar. Birinji aýlawda Haser Alizadehden (Eýran) ýeňilenden soň, A.Annamämmedow teselli ýaryşynda bürünç medal alyp biljekdi. Emma ol Atabek Azizbekowdan (Gyrgyzystan) ýeňilip, mümkinçilikden peýdalanyp bilmedi. 

Ertir Hançžou şäherinde geçirilýän Aziýa oýunlarynda türgenler karate (WKF) we jiu-jitsu boýunça medallar ugrunda bäsleşer, bu ýaryşlaryň hersinde dört türgen Türkmenistana wekilçilik eder.