Astanada geçirilen ýetginjekleriň (16 ýaşlylaryň) we 18 ýaşlylaryň arasynda Aziýa çempionatynda türkmen boksçulary jemi ýedi - bir altyn, üç kümüş we üç bürünç medal gazandylar.

13 agram derejesinde geçirilen çempionatyň baýraklary ugrunda 23 ýurtdan - Wýetnamdan, Gonkongdan, Hindistandan, Iordaniýadan, Yrakdan, Eýrandan, Ýemenden, Gazagystandan, Koreýa Respublikasyndan, Kuweýtden, Gyrgyzystandan, Malaýziýadan, Mongoliýadan, Birleşen Arap Emirliklerinden, Pakistandan, Palestinadan, Täjigistandan, Tailanddan, Taýwandan, Türkmenistandan, Özbegistandan, Filippinlerden we Ýaponiýadan 200-den gowrak ýaş türgen gatnaşdy.

Iň ýaş boksçularyň arasynda geçirilen ýaryşda ildeşlerimiz dört medal eýelediler. Daýanç Durdynepesow (63 kg çenli agramda) hormat münberiniň ýokarky gatyna çykdy. Sanjar Hemraýew (48 kg çenli) we Abdylla Hojaýew (50 kg çenli) kümüş, Seýitjan Babajanow (54 kg çenli) agramlarda bürünç baýraklara mynasyp boldular.

18 ýaşlylaryň arasynda geçirilen birinjilikde türkmenistanlylar üç: Eziz Gylyjow (57 kg çenli) kümüş, Yhlas Bagtyýarow (75 kg çenli) we Mustapa Muhammetdurdyýew (92 kg çenli) agramlarda bürünç medal gazandylar.

Boksçularymyzyň üstünliklerinde Türkmenistanyň 18 ýaşlylar we ýetginjekler toparynyň tälimçileri Sapardurdy Bagyýewiň we Maksud Şeripowyň, şeýle hem milli ýygyndy toparyň baş tälimçisi Teňilbek Jumakulowyň hyzmatlary uludyr.