Sportuň gyşky görnüşleri boýunça sport toplumynyň Aşgabat buzly mekdebinde tälim alýanlar Täze 2024-nji ýyly garşylamaga bagyşlanan çykyşlaryny taýýarladylar.

Gyşyň esasy baýramçylygy mynasybetli buz üstünde şüweleňi guramak, ýüreklerinde tomaşaçylary haýrana goýmak, täsir, geň galdyrmak hem-de hakykatdan-da, täze ýyl keýpiçaglygyny bagyş etmek hyjuwyny beslän türkmen figuralaýyn typyjylarynyň asylly däbine öwrüldi.

Şüweleňli çykyşlaryň ilkinji tomaşaçylary buzly köşgüň özlerine niýetlenilen ýerlerinde oturyp, dessine gyş ertekisine aralaşýarlar. Täze ýyl öwüşginleri diňe bir zalyň baýramçylyk bezeginde we çykyş edýänleriň toý lybaslarynda däl, eýsem, buz örtügi düşelen meýdançanyň ähli ýeri boýunça ýaýylyp gidýän buzly giňişligi hem gurşap alýar.

Meýdançada Aýazbabanyň we Garpamygyň peýda bolmagy şüweleň başlanýar. Şüweleňiň maksatnamasynda ýaş figuraçylar tarapyndan ýerine ýetirilen aýdym we saz toparlarynyň çykyşlarynyň 40-dan gowragy boldy.

Figuralaýyn typmagyň körpeje ýyldyzjyklary buzly meýdançada biri-birlerini yzygiderli çalşyp, tomaşaçylaryň içini gysdyrmady, olara baýramçylyk çykyşlary bilen uly joşgun paýladylar. Tomaşaçylary şadyýan Aýazbaba hem ruhlandyrýar. Tamamlanyp barýan ýylyň nyşany bolan towşanyň hem-de ýetip gelýän ýylyň nyşany – balygyň bilelikdäki tansy maksatnamanyň esasy özeni boldy.

– Biziň figuralaýyn typmak mekdebimizde tälimçileriň ýedisi zähmet çekýär – diýip, mekdebiň direktory Andreý Öwezow gürrüň berýär. – Türgenler tälimçiler bilen tilsimleriň tehnikasynyň üstünde işleýärler, umumy beden taýýarlygy we horeografiýa bilen meşgullanýarlar, bu bolsa ýaş türgenlere halkara ýaryşlaryna gatnaşmaga hem-de mynasyp netijeleri gazanmaga mümkinçilik berýär. Mysal üçin, şu ýylyň oktýabr aýynda Türkmenistandan figuralaýyn typyjylaryň 9-sy Daşkentde geçirilen «Global Skating Academy» ilkinji toparlaýyn ýaryşa gatnaşyp, typmagyň ýokary derejesini görkezdiler we medalyň hem-de baýraklaryň eýeleri boldular.

Köp babatda ýaş figuraçylaryň üstünlikleri sportuň gyşky görnüşlerini ösdürmek üçin ýurdumyzyň hökümeti tarapyndan döredilen şertleriň we tejribeli tälimçiler bilen işlemegiň netijesinde gazanylýar. Häzir buzly meýdançada Karina Mowsesýanda, Ýana Wahitowada, Elina Karimowada, Abat Muhammetniýazowada we Zeýnab Rejepowada tälim alýan figuraçylar öz ussatlyklaryny görkezýärler.

Figuralaýyn typmakdan başga-da, ýaşlaryň gyşky sportuň beýleki görnüşlerine-de gyzyklanma artýar. Türkmenistanyň şort-trek boýunça ýygyndy topary konkide ylgaýjylaryň Halkara bileleşigine girip, Kuzbasda (Russiýa) «Aziýanyň çagalary-2023» atly II gyşky Halkara sport ýaryşlaryna gatnaşdy. Şort-trek boýunça baş tälimçi Aýhanym Gulamalyýewanyň belleýşi ýaly, häzirki wagtda, şeýle hem şort-trek boýunça Türkmenistanyň çempionaty hem-de ýurduň açyk birinjiligi ugrunda ýaryş geçirildi. Bu iri ýaryşlar ýurdumyzda konkide ylgamak sportunyň öňdebaryjylaryny ýüze çykarmaga mümkinçilik berdi.

Mundan başga-da, Aşgabadyň sportuň gyşky görnüşleri köşgüniň binýadynda kýorling ugry hereket edýär. Ýetginjeklere Sakina Gulamalyýewa tälim berýär. Türgen gyzyň özi figuralaýyn typmagy özleşdirmekden başlap, konkide ylgamak sportuna çenli uly ýoly geçdi. Buzda onuň täsirli we özüne çekiji çykyşlaryny häzirki baýramçylyk maksatnamasynda hem synlamak bolýar.

Türkmen figuraçylarynyň buz üstündäki uly şüweleňi giň halk köpçüligi üçin milli telewideniýäniň Täze ýyla bagyşlanan gepleşiklerinde görkeziler.