Türkmenistanyň futbol boýunça çempionatynyň 26-njy tapgyrynyň wagty üýtgedilen iki oýny Balkanabatda we Maryda geçirildi.

Bürünç medal ugrunda göreşýän «Nebitçi» topary Balkan welaýatynyň dolandyryş merkezinde Marynyň «Energetigini» myhman aldy. Oýnuň birinji ýarymy toparlaryň hiç birine-de üstünlik getirmedi. Ikinji ýarymynda bolsa meýdança eýeleri garşydaşynyň derwezesine iki pökgi geçirdiler, bular Magtymberdi Berenow (47-nji minut) we Ylýas Akyýew (75-nji minut) dagynyň atlaryna ýazyldy.

Milli birinjilik ugrundaky ýaryşyň tamamlanmagyna bir tapgyr galanda, üçünji orunda barýan «Nebitçi» 2:0 hasabynda ýeňiş gazanyp, söbügini basyp gelýän 35 utukly, heniz iki oýny oýnalmadyk «Ahaldan» bürünç medal ugrundaky göreşde aratapawudyny 5 utuk artdyrdy. Şol wagt Mary welaýatynyň dolandyryş merkezindäki «Sport toplumy» stadionynda geçirilen oýunda ýakynda AFK-2023/24-üň Kubogyna gatnaşan toparlar – «Merw» we «Altyn asyr» özara düşünişýärdiler.

Ozal habar berlişi ýaly, Aziýanyň ähmiýeti boýunça ikinji klub ýaryşynyň çäginde bu toparlar Aşgabatda iki gezek duşuşypdylar. Iki oýunda-da «Altyn asyr» ýeňiş gazanypdy: birinji oýunda – 2:1, ikinjide – 1:0.

Bu gezek ýaryş sanawynda iň soňky hatarda duran «Merw» Türkmenistanyň wise-çempionyna Murgap kenaryndan 3 utugy alyp gitmäge ýol bermedi. Hasaby 12-nji minutda myhmanlar açdylar. Muny Hoşgeldi Hojowow etdi. 38-nji minutda bolsa Toýly Goçnazarow hasaby deňledi – 1:1.

Bu oýundan soň «Altyn asyr» 51 utuga eýe boldy, diýmek, Ýazguly Hojageldiýewiň şägirtleri üçin çempionatyň ahyryna çenli «Ahal» bilen oýnalmadyk ýene bir oýun galýar. «Merw» bolsa 14 utuk toplap, milli birinjilikdäki çykyşyny tamamlady. Türkmenbaşynyň «Şagadamynyň» hem 14 utugy bar, ýöne ol entek «Nebitçi» we «Ahalyň» hersi bilen bir oýun oýnamaly.