Ýurdumyzyň Lebap welaýatynyň Çärjew etrabynyň Talhanbazar geňeşliginiň çäginde ýerleşýän, Türkmenistanyň Senagatçylar we telekeçiler birleşmesiniň agzasy «Altyn bürgüt» hususy kärhanasynyň döwrebap ýyladyşhanalar toplumynda pomidoryň bol hasyly kemala getirilýär.
2021-nji ýylyň mart aýynyň 25-inde açylyp ulanylmaga berlen, jemi 8,5 gektar meýdanda ýerleşip, 6 bölekden ybarat bolan bu ýyladyşhanalar toplumynda pomidoryň 192 müňden gowrak düýbi ösdürilip ýetişdirilýär. Ýyladyşhana häzirkizaman innowasion tehnologiýalar bilen enjamlaşdyrylandyr, şeýle hem pomidor nahallaryny iýmitlendirmek, ýyladyşhanada howa çalşygyny amala aşyrmak, durnukly ýylylygy saklamak işleri awtomatiki usulda kompýuterleriň üsti bilen amala aşyrylýar.
Desgada pomidor nahallarynyň düýp emele getirişine, ösüşine, hasyla durşuna ýörite synag enjamlarynyň üsti bilen hünärmenler tarapyndan yzygiderli gözegçilik amala aşyrylýar. Bu döwrebap ýyladyşhananyň esasy aýratynlyklarynyň biri hem pomidor nahallarynyň kokos gabygynyň gyryndylary ýerleşdirilen gaplarda ýetişdirilýänligindedir. Bu ýerde pomidorlaryň bol hasyl berýän morwelans, makseza, furioza, perimos, martinik ýaly görnüşleri ösdürilip ýetişdirilýär.
Pomidor nahallarynyň güllän mahaly tozanlandyryş işleriniň ýörite arylaryň üsti bilen amala aşyrylmagy hem pomidor hasylynyň deň ululykda ýetişmeklerine we hasyla durmaklaryna ýardam edýär. «Altyn bürgüt» hususy kärhanasynyň ýyladyşhanalar toplumynda işleriň guramaçylykly alnyp barylmagy, agrotehniki kadalaryň doly berjaý edilmegi pomidoryň bol hasylyny ýetişdirmeklige, ýagny her düýpden ortaça 15 kg, her gektardan bolsa, 230 – 250 tonna ýokary hilli, ekologiki taýda arassa pomidor hasylyny almaklyga mümkinçilik berýär.
Kärhanada pomidor hasylyny ýygnamak işleri tapgyrlaýyn amala aşyrylýar, şeýle hem ýylyň dowamynda 2 müň tonnadan gowrak ýokary hilli, ekologiki taýdan arassa pomidor hasyly ýygnalyp, alyjylara hödürlenýär. Ýyladyşhanada ýygnalan hasyly saklamaklyk üçin ýöriteleşdirilen ammarlar hyzmat edýär. Öndürilýän pomidor hasylynyň 80 göterimden gowragy daşary ýurtlara – Russiýa Federasiýasy, Gazagystan ýaly döwletlere eksport edilýär, hasylyň galan bölegi bolsa, içerki bazarlarda ilata ýetirilýär.
