Aşgabatly 24 ýaşly halkara küşt ussady Saparmyrat Atabaýew Türkiýede indi 33 ýyl bäri geçirilýän «Ak pil» naýbaşy küşt ýaryşynda ýeňiji boldy.

Türkmenistanyň Küşt federasiýasynda «AA»-nyň habarçysyna habar berlişine görä, 27 küştçi baýraklar ugrunda bäsleşdi, olaryň 9-sy uly netijeler gazananlardy.

Ýaryş Şweýsariýa ýörelgesi boýunça 7 tapgyrda geçirildi, onda ildeşimiz alty gezek ýeňiş gazandy we bir döwi deň tamamlady. Netijede Saparmyrat 6,5 utuk toplady we özi bilen deňme-deň oýnan türkiýeli halkara küşt ussady Tarhan Adardan öňe geçdi.

Geçen ýyl aşgabatly Saparmyrat Atabaýewiň dekabr aýynda Özbegistanyň paýtagtynda geçirilen «Rokirowka2023 Masters» küşt festiwalynda ýeňiş gazanyp, grossmeýster adyny almaga talaplaryň ählisini ýerine ýetiripdi.