Türkmenbaşynyň Halkara deňiz portunyň Merkezi Aziýanyň eksportunyň üstaşyr geçiriji merkezi hökmünde roly onlaýn ýagdaýda geçirilen tegelek stoluň dowamynda ara alnyp maslahatlaşyldy.

Tegelek stol Türkmenbaşy Halkara deňiz portunyň hyzmatlaryny tanatmak, bu portuň üsti bilen üstaşyr gatnawy köpeltmek we sebit ýurtlarynyň arasyndaky söwda gatnaşyklaryny beýleki ýurtlaryň ugruna giňeltjek alternatiw ýük daşamak ugurlaryny hödürlemekden ybaratdy.

Bu çäre USAID-iň Merkezi Aziýa söwda maksatnamasynyň goldawy bilen Türkmen Logistika assosiasiýasy we Merkezi Aziýadaky Korol Logistika we Ulag Institutynyň (CILT Central Asia) wekilhanasy tarapyndan guraldy.

Gatnaşanlar Türkmenbaşy Halkara deňiz portunyň üsti bilen ýük daşamak, transport meýilnamalary we nyrhlary, ekspeditor we logistika hyzmatlary we kagyz resminamalary ýaly amaly meseleleri ara alyp maslahatlaşdylar.

Onlaýn duşuşyk eksportçularyň, iberijileriň, ekspeditorlaryň, daşaýjylaryň, Merkezi Aziýa ýurtlaryndan logistika kompaniýalarynyň wekilleriniň, Türkmenbaşy Halkara deňiz portunyň, «Türkmendeňizderýaýollary» agentliginiň, Transport we aragatnaşyk gullugynyň, «Türkmenistanyň ulag we logistika merkeziniň», Täjigistanyň Transport ministrliginiň, Özbegistanyň Transport ministrliginiň işgärleriniň gatnaşmagynda geçirildi.