Türkmenistanyň Döwlet energetika institutynyň mugallymlarynyň we «Dikeldilýän energiýa çeşmeleri» ylmy-önümçilik merkeziniň alymlarynyň, Türkmenistanyň Energetika ministrliginiň inženerleriniň, Türkmenistanyň Daşky gurşawy goramak ministrliginiň uýgunlaşdyryş taslamasynyň hünärmenleri bilen iş duşuşyklary we BMGÖM-iň «Durnukly şäherler» taslamasy yzygiderli geçirilýär.

Bu gezek ylmy alyş-çalşyň temasy, gurulýan ýokary okuw mekdebiniň binalarynda talyplar şäherçesiniň binagärligine gurlan dikeldilýän energiýa çeşmeleriniň we innowasiýa tehnologiýalarynyň elementlerini ulanmak mümkinçiligini ara alyp maslahatlaşmak boldy.

«Durnukly şäherler» taslamasynyň energiýa netijeliligi boýunça hünärmeni Atamuhammet Saryýew şeýle gürrüň berýär:

– Duşuşyga gatnaşyjylar gurluşyk meýdançalaryna baryp gördüler we innowasiýa tehnologiýalaryny ornaşdyrmak boýunça işleriň gidişi bilen tanyşdylar. Şeýle gezelençlerde «akylly öý» desgasynyň elektrik üpjünçiligi ulgamynyň tehniki aýratynlyklaryna we gurulýan binalaryň hem-de desgalaryň energiýa netijeliligine baha berildi. Soňra «aýak üstündäki» çekişmeler gurluşyk meýdançasyndan Türkmenistanyň Döwlet energetika institutynyň «Dikeldilýän energiýa çeşmeleri» ylmy-önümçilik merkeziniň önümçilik binýadyna geçirildi.

Taslamanyň wekilleri, şeýle hem Türkmenistanyň Döwlet energetika institutynyň alymlary bilen bilelikde amala aşyrylan işleriň netijeleri we hyzmatdaşlygyň indiki ädimleri barada pikir alyşdylar, ol häzirki wagtda beýleki zatlar bilen bir hatarda «Awaza» milli syýahatçylyk zolagyndaky synag myhmanhanasynda gün elektrik stansiýasy üçin tehniki taslama resminamalaryny taýýarlamaga gönükdirilendir.

Türkmenistanyň Döwlet energetika institutynda 2014-nji ýyldan bäri «alternatiw we dikeldilýän energiýa çeşmeleri» ugry boýunça hünärmenleri taýýarlanylýar. «Energiýa tygşytlaýyş tehnologiýalary» kafedrasynyň açylmagy bilen onuň düzüminde institutyň düýnki uçurymlary işe başladylar, şeýle hem institutyň düzüminde ylmy-önümçilik merkeziniň işläp başlamagy bilen institutyň tehnologiki we ylmy mümkinçilikleri artýar. Olar institutyň abraýyny göterýär we ony has döwrebap ylym-bilim merkezine öwürýär, ýurdumyz üçin zerur hünärleri we özbaşdak ylmy başarnyklary aljak ýaş türkmenistanlylary özüne çekýär.