Türkmenistanyň Daşary işler ministrliginiň Halkara gatnaşyklary institutynda ýöriteleşdirilen «Diplomatik protokol» okuw merkezini üstünlikli tamamlan hünärmenlere şahadatnamalaryň gowşurylyş dabarasy geçirildi. 

Ýokary okuw mekdebiň okuw merkezi diplomatiýa we halkara gatnaşyklary ulgamynda ýöriteleşýän işgärleri dördünji gezek taýýarlady. Iki aýyň dowamynda okuwyň diňleýjileri üçin okuwlar daşary ýurtlaryň we halkara guramalaryň ýurdumyzdaky wekilhanalarynyň, Türkmenistanyň milli diplomatik gullugynyň wekilleriniň, şeýle hem Türkmenistanyň DIM-niň HGI-niň halypa-diplomatlarynyň köp ýyllyk tejribeleri nazarda tutulyp taýýarlanylan ýörite maksatnamalaryň esasynda geçirildi. 

Türkmenistanyň Bilim ministrliginiň hem-de Türkmenistanyň Daşary işler ministrliginiň Halkara gatnaşyklary institutynyň wekilleri merkeziň uçurymlaryny taýýarlyk okuwlaryny üstünlikli tamamlamaklary bilen gutladylar. 

Türkmenistanyň Daşary işler ministrliginiň işgärler mümkinçiligini kämilleşdirmäge we berkitmäge, halkara derejesinde ýurdumyzyň bähbitlerine mynasyp wekilçilik etmäge ukyply ýokary derejeli diplomatlaryň hemmetaraplaýyn taýýarlanylmagyna Türkmenistanda uly üns berilýär. Ýurdumyzyň abraýly halkara guramalaryna gatnaşmagy yzygiderli we maksadalaýyk giňeýär. 

Türkmenistanyň Diplomatik işgärleriniň güni mynasybetli 2024-nji ýylyň 18-nji fewralynda ýurduň DIM-niň HGI-sinde açylan ýöriteleşdirilen «Diplomatik protokol» okuw merkeziniň işi bu wezipeleriň çözülmegine ýardam etmäge gönükdirilendir. Bir ýyla golaý wagtda merkez ýurduň diplomatik gullugy üçin dört tapgyrda hünärmenleri taýýarlady we goýberdi.