«Ylym» neşirýaty ýokary okuw mekdepleriniň žurnalistikany öwrenýän talyplaryna niýetlenen «Sport fotožurnalistikasy» okuw kitabyny neşir etdi.

Okuw kitabyny Türkmen döwlet bedenterbiýe we sport institutynyň ylym bölüminiň müdiri Şamuhammet Nepesow taýýarlady. Täze okuw kitabynda sport fotožurnalistikasynyň görnüşleri giňişleýin beýan edilýär, sport temalaryndan makalalar ýazmak we olaryň suratlar bilen bezelişi boýunça maslahatlar berilýär, şeýle hem milli köpçülikleýin habar beriş serişdelerinde sport ugrundan makalalar ýazmagyň, fotoreportažlaryň hem-de beýlekileriň bezegi üçin žurnalistik usullaryna we tilsimlerine garalýar.

Kitap girişden we «Düzgün-tertibiň maksady we wezipeleri», «Fotografiýanyň döremeginiň taryhy», «Fotožurnalistika taryhyndan umumy maglumatlar», «Türkmen metbugatynda fotožurnalistika», «Türkmen metbugatynyň taryhyndan», «Sportuň jemgyýetdäki orny», «Sport žurnalistikanyň ugry hökmünde», «Ilkinji sport gazetleri we žurnallary», «Türkmen sport fotožurnalistleri» , «Sport fotožurnalistine kömek: sport ýaryşlaryny nädip surata düşürmeli?», «Sportuň görnüşlerine görä surata düşürmegiň aýratynlyklary», «Internet we sport fotožurnalistikasy», «Sport fotožurnalistikasynyň žanrlary», «Sport fotožurnalistikasy we etika» ýaly bölümlerden ybarat.

Gollanmanyň materiallary ýokary okuw mekdepleriniň talyplaryna sport fotožurnalistikasynyň aýratynlyklaryny, sport fotoýordumlarynyň döredilişini, olary neşirlerde ýerleşdirmegiň düzgünlerini we sport fotožurnalistiniň işi bilen baglanyşykly beýleki möhüm ugurlaryny has çuňňur öwrenmäge kömek eder.