Şu gün paýtagtymyzdaky «Daşkent» dynç alyş seýilgähinde ýakymly ýagdaýlar höküm sürdi, çünki Özbegistan Respublikasynyň Medeniýet günleriniň çäginde Türkmenistanda guralan çäreler şu ýerde dowam etdi.

Köp sanly myhmanlar, şol sanda dostlukly ýurtdan gelen artistleri we medeniýet işgärleri türkmen milli däp-dessurlaryna mahsus hoşamaýlyk we mähir bilen garşylandy. Olara datly tagamlaryň hödür edilmegi we aýdymdyr sazlar iki halkyň arasynda dostlukly hem-de medeni gatnaşyklaryň ähmiýetini nygtap, baýramçylyk ruhuny döretdi.

Myhmanlar özbekleriň baý medeniýetiniň köpdürlüligini görkezýän milli bezeg we binagärlik ýörelgelerine kybap seýilgähiň owadanlygyna mynasyp baha berip, Özbegistanyň paýtagtynda ýerleşýän «Aşgabat» seýilgähini ýatladylar.

Özbegistanyň sungatda at gazanan işgäri Abdukaýum Ýuldaşew:

– Daşkendäki «Aşgabat» seýilgähiniň, hem Türkmenistanyň paýtagtyndaky «Daşkent» seýilgähi ýaly Magtymguly şaýolunda bolşy ýaly, Magtymguly köçesinde ýerleşýändigi geň ýagdaý. Bu seýilgähi diňe fotosuratlarda görýärdim, indi bolsa öz gözlerim bilen görüp bilendigime diýseň begenýärin. Aşgabat şäheri hakykatdanam owadan: howasy arassa, ýollary giň. Ýeri gelende aýtsak, bu ýerden diňe ýatlamalary däl, eýsem, sowgat edilen özbek şahyry Muhammet Ýusufyň türkmen diline terjime edilen goşgular kitabyny hem alyp barýaryn. Bu gymmatly sowgady şahyryň öý muzeýine sowgat ederin – diýip, gürrüň berdi.

Gürrüňdeşligimizi asman astynda konsertiň başlanandygyny aňladýan deprekleriň ýiti sesi kesýär. Ýunus Rajabi adyndaky «Makom» ansamblynyň artistleri Aşgabadyň ýaşaýjylary we paýtagtymyzyň myhmanlary üçin milli saz gurallarynda halk aýdymlaryny we sazlaryny ýerine ýetirdiler.

Özbegistanyň halk artisti Gulomjon Ýakubow:

– Türkmenistanda bizi mähirli garşy aldylar. Düýn Döwlet medeniýet merkeziniň Mukamlar köşgünde çykyş etdik, konsert ýokary derejede guraldy. Men türkmen dilinde birnäçe aýdym aýtdym. Halklarymyzyň arasynda umumylyklary köp: medeniýetimiz we dilimiz meňzeş. Goý, türkmen we özbek halklarynyň arasynda hemişe dostluk we doganlyk höküm sürsün – diýdi.

Özbek senetçileri bu çärä goşmaça röwüş çaýdy. Çeper elli Şahnoza Jumaýewanyň aýdyşy ýaly, elde gaýalýan altyn nagyşlar Samarkandda we onuň dogduk ili Buhara şäherinde şöhrat getirdi.

– Özbegistanda senetçilik merkezleri köp. Men «Hunarma» senetçilik merkezine wekilçilik edýärin we otuz ýyldan gowrak wagt bäri bu iş bilen meşgullanýaryn. Men okuwçylaryma we kömekçilerime bilimdir hünärimi öwredýärin. Türkmenistana ilkinji gezek gelşim, dessine-de senetçi hökmünde türkmen gyzlarynyň owadan milli köýneklerine gözüm düşdi. Aýratynam, türkmen nagyşly haly horjunlary meni haýran galdyrdy.

«Daşkent» dynç alyş seýilgähinde geçirilen medeni gürrüňdeşlik myhmanlarda ýatdan çykmajak duýgulary galdyrdy. Indi myhmanlar geljekki çäreleriň çäklerinde medeniýet we däp-dessur gatnaşyklaryny dowam etmek üçin Türkmenabat şäherine giderler.