Türkmenistanyň Bilim ministrliginde şu aýyň birinji on günlüginde geçirilen halkara bäsleşikleriň ýeňijilerini sylaglamak dabarasy boldy.
Dabara esasan ýurdumyzyň orta hem-de ýokary okuw mekdepleriniň okuwçylarydyr talyplary gatnaşdylar. Olar abraýly halkara gözden geçirişlerde üstünlikli çykyş edip, Türkmenistana mynasyp wekilçilik etdiler.
«MEMORIAD – 2024» atly zehin sportlary boýunça Bütindünýä olimpiadasynda Türkmenistanyň düzüminde orta mekdepleriniň 17 okuwçysy bolan milli toparymyz ilkinji gezek çykyş etdi hem-de ajaýyp netijeleri görkezdi.
Olimpiadanyň netijeleri boýunça Aşgabat şäherindäki 2-nji orta mekdebiň okuwçysy Ogulmaral Altyýewa we Lebap welaýatynyň Türkmenabat şäherindäki ýöriteleşdirilen 41-nji orta mekdebiň okuwçysy Mekan Nurgeldiýew altyn medallary gazandylar. Türkmenabat şäherindäki daşary ýurt dillerini çuňlaşdyryp öwredýän ýöriteleşdirilen 29-njy orta mekdebiň okuwçysy Aýgül Ýusupowa kümüş medala mynasyp boldy.
Birleşen Arap Emirlikleriniň Dubaý şäherinde 4-11-nji noýabry aralygynda geçirilen «MEMORIAD – 2024» bäsleşiginde dünýäniň 60-dan gowrak ýurdundan 150-den gowrak mekdep okuwçylarynyň güýç synanyşandygyny bellemek gerek.
Indoneziýa Respublikasynyň Bali şäherinde 5-10-njy noýabry aralygynda geçirilen VI halkara ylym we oýlap tapyşlar ýarmarkasynda (6th International Science and Invention Fair (ISIF)) türkmen okuwçylarynyň ylmy işläp taýýarlamalary ýokary baha eýe boldy. Iri halkara wakasy dünýäniň 24 ýurdundan toparlaryň 324-sini bir ýere jemledi.
Bu çäräniň netijeleri boýunça Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 11-12-nji synp okuwçylary tapawutlandylar. Döwletmyrat Alymuhammedow ýörite baýraga we altyn medala mynasyp boldy, Kerimberdi Myratlyýew we Rahmanberdi Ödemyradow altyn medallary aldylar. Oguzhan Mergenow hem-de Muhammetguly Oraznepesow kümüş medallara mynasyp boldular.
Şeýle hem S.A.Nyýazow adyndaky Türkmen oba hojalyk uniwersitetiniň 4-nji ýyl talyplary Ýaran Hudaýberdiýew we Kerim Meredow hem-de Türkmenistanyň Oguz han adyndaky Inžener-tehnologiýalar uniwersitetiniň talyby Gowşut Akmyradow altyn medallaryň eýeleri boldular.
Sylaglanyş dabarasynda talyplardyr okuwçylaryň adyna köp sanly gutlaglar we mundan beýläk-de yhlasly we netijeli okamak, döredijilik, sport, ylym ugurlary boýunça üstünlikleri gazanmak hem-de geljekde-de täze ýokary baýraklara eýe bolmak baradaky arzuwlar beýan edildi.
Ýeňijilere Türkmenistanyň Bilim ministrliginiň we Türkmenistanyň Magtymguly adyndaky Ýaşlar guramasynyň adyndan Hormat hatlar hem-de gymmat bahaly sowgatlar gowşuryldy.
