27-nji noýabrda paýtagtymyzda «Innowasiýalar, täze tehnologiýalar we olary önümçilige ornaşdyrmagyň meseleleri» atly III türkmen-hytaý ylmy-innowasion forumynyň ikinji güni geçdi.
Türkmenistanyň Ylymlar akademiýasynyň Halkara ylmy-tehnologiýa parkynda «tegelek stoluň» sekizisi geçirildi, olarda bilermenler ylym we tehnologiýalar pudagynda hyzmatdaşlygyň esasy ugurlaryny ara alyp maslahatlaşdylar.
«Himiki tehnologiýalar tebigy çig mallary gaýtadan işlemekde innowasion tehnologiýalar», «Nanotehnologiýalar, täze materiallary işläp taýýarlamak we öndürmek», «Biotehnologiýalar, oba hojalygynda innowasion tehnologiýalar», «Seýsmologiýa», «Maglumat we telekommunikasiýa ulgamlary, kompýuter tehnologiýalary», «Energiýa tygşytlaýjy tehnologiýalar, energiýanyň gaýtadan dikeldilýän çeşmeleri», «Lukmançylykda we farmakologiýada ýokary tehnologiýalar», «Ynsanperwer ylymlary» ýaly wajyp temalary ara alyp maslahatlaşmaga iki ýurduň köp sanly hünärmenleri gatnaşdylar.
Forumyň netijesinde Hyzmatdaşlyk boýunça hökümetara türkmen-hytaý komitetiniň Ylmy-tehniki hyzmatdaşlyk boýunça kiçi komitetiň ikinji mejlisiniň Teswirnamasyna gol çekildi. Resminamada taraplaryň ikitaraplaýyn birnäçe resminamalary esasynda ylmy hyzmatdaşlygy ösdürmek meýilleri beýan edilýär:
-
Türkmenistanyň Ylymlar akademiýasynyň Halkara ylmy-tehnologiýa parky bilen Hytaý Halk Respublikasynyň Hubeý welaýatynyň Halkara ylmy-tehniki alyşmalar merkeziniň arasynda Türkmen-hytaý ylmy-tehniki hyzmatdaşlyk merkezini döretmek barada özara düşünişmek hakynda Ähtnama.
-
Türkmenistanyň Ylymlar akademiýasynyň Halkara ylmy-tehnologiýa parky bilen Hytaý Ylymlar akademiýasynyň Mikrobiologiýa institutynyň arasynda özara düşünişmek hakynda Ähtnama.
-
Türkmenistanyň Ylymlar akademiýasynyň Himiýa instituty bilen Hytaýyň Týanszinin ylmy-tehniki uniwersitetiniň arasynda özara düşünişmek hakynda Ähtnama.
-
Türkmenistanyň Oguz han adyndaky Inžener-tehnologiýalar uniwersiteti bilen Hytaý Ylymlar akademiýasynyň Inžener termofizika institutynyň arasynda özara düşünişmek hakynda Ähtnama.
-
Türkmenistanyň Ylymlar akademiýasynyň Seýsmologiýa we atmosferanyň fizikasy instituty bilen Hytaýyň Ýer titremesi administrasiýasy boýunça seýsmologiýa institutynyň arasynda ylmy-tehniki hyzmatdaşlyk baradaky Ylalaşyk.
Türkmen-hytaý ylmy-innowasiýa forumy tejribe we bilim alyşmak üçin möhüm meýdança boldy. Gol çekilen resminamalar ylym we tehnologiýalar pudagyndaky hyzmatdaşlygy çuňlaşdyrmak, bilelikdäki innowasion taslamalaryny durmuşa geçirmek we iki ýurtda ylmy gözlegleri ösdürmek üçin möhüm ädimdir.
