Tailandyň, Hytaý Taýbeýiniň we Şri-Lankanyň milli ýygyndylary Kuala-Lumpurda (Malaýziýa) geçirilen Aziýa Kubogy ugrundaky ýaryşyň saýlama oýunlaryna bije netijesinde türkmen futbolçylary bilen oýnarlar. 

6 toparça bölünen 24 topar saýlama ýaryşda çykyş ederler.

Türkmenistan we garşydaşlary «D» toparça düşdiler. 

Beýleki toparçalarda:

«A» toparçada: Täjigistan, Filippinler, Maldiwler, Gündogar Timor,

«B» toparçada: Liwan, Ýemen, Butan, Bruneý,

«C» toparçada: Hindistan, Gonkong (HHR), Singapur, Bangladeş,

«E» toparçada: Siriýa, Owganystan, Mýanma, Pakistan,

«F» toparçada: Wýetnam, Malaýziýa, Nepal, Laos çykyş ederler.

Toparçalaryň ýeňijileri 2027-nji ýyldaky Aziýa Kubogy ýaryşynyň finalyna çykarlar.

Eýýäm 18 topar 2027-nji ýyldaky Aziýa Kubogy ýaryşynyň final tapgyryna gatnaşmak hukugyny eýeledi. Olar 2026-njy ýyldaky dünýä çempionatynyň 3-nji tapgyryna gatnaşýan Awstraliýanyň, Bahreýniň, Indoneziýanyň, Iordaniýanyň, Yragyň, Eýranyň, Kataryň, Hytaýyň, KHDR-iň, Koreýa Respublikasynyň, Kuweýtiň, Gyrgyzystanyň, Birleşen Arap Emirlikleriniň, Omanyň, Palestinanyň, Özbegistanyň, Ýaponiýanyň we Saud Arabystanynyň (guramaçy hökmünde) milli ýygyndylarydyr.

Futbol boýunça üç gezek (1984, 1988 we 1996-njy ýyllarda) Aziýanyň çempiony bolan Saud Arabystany ilkinji gezek yklymyň baş futbol ýaryşyny kabul eder. 

Türkmen futbolçylary iki gezek Aziýa Kubogy ýaryşynyň final tapgyryna gatnaşdylar. Ilkinji gezek 2004-nji ýylda Hytaýda, ikinji gezek bolsa 2019-njy ýylda Birleşen Arap Emirliklerinde geçirilen ýaryşda çykyş etdiler. Öňki ýaryşda Türkmenistanyň milli ýygyndysy «E» saýlama toparynda 3-nji orny eýeledi, ýöne 2023-nji ýylda Katarda geçirilen Aziýa Kubogy final ýaryşyna çykmady.

Futbol boýunça Aziýanyň Kubogy ugrunda ýaryş dört ýyldan bir gezek geçirilýär. Ilkinji gezek 1956-njy ýylda geçirilipdi. 2007-nji ýyldan bäri bu ýaryş täk ýyllarda geçirilýär.

Aziýanyň häzirki çempiony Kataryň ýygyndy topary 2019-njy we 2023-nji ýyllarda iki gezek yklym kubogyny eýeledi.