«Arkadag» futbol toparynyň we «Ahal» toparynyň oýunçylary ähmiýeti boýunça ikinji derejeli klublar baýragy – Türkmenistanyň Kubogy ugrunda aýgytlaýjy oýunda duşuşarlar. Ol ýarym final oýunlarynyň netijeleri esasynda belli boldy.
Birinji ýarym final oýunda «Arkadag» topary Balkanabadyň «Nebitçi» toparyny iki gezek ̶ myhmançylykda 7:2, öz meýdançasyndaky jogap oýnunda 5:2 hasabynda ýeňlişe sezewar etdi, onda ýeňijilerden Enwer Annaýew (4-nji), Begmyrat Baýew (24-nji), Begenç Akmämmedow (30-njy), Didar Durdyýew (86-njy) we Nazar Towakelow (89-njy) we ýeňilenlerden – Ysmaýyl Serdarow (62-nji) we Şöhrat Aýdogdyýew (81-nji) minutlarda tapawutlandylar.
Beýleki ýarym finalda «Ahal» topary ýeňiji diýlip yglan edildi, topara «Altyn asyr» topary bilen iki oýunda hem 3:0 hasabynda tehniki ýeňiş berildi.
«Ahal» topary üçin Türkmenistanyň Kubogy ugrunda ýaryşyň indiki finaly ýaryşyň taryhynda sekizinjisi bolar. Ozal «Ahal» topary bu baýragy dört gezek eýeledi, her gezek hem «Türkmennebitönümleri» Baş müdirliginiň toparyny dürli tälimçiler şu üstünlige ýetirdiler. 2013-nji ýylda Türkmenistanyň at gazanan tälimçisi Aly Gurbanynyň ýolbaşçylygynda bu klubyň oýunçylary aýgytlaýjy oýunda «Altyn asyr» toparyny – 2:1 hasabynda utdy. 2014-nji ýylda-da ýene şeýle üstünlik gazandylar, ýöne bu gezek baş tälimçi Guwançmuhammet Öwekowyň ýolbaşçylygynda finalda «Balkan» toparyny 3:2 hasabynda ýeňdi.
«Ahal» topary üçünji gezek 2017-nji ýylda baş tälimçi Röwşen Meredowyň ýolbaşçylygynda «Şagadam» toparyndan 4:0 hasabynda üstün çykyp, Türkmenistanyň Kubogyny eýeledi. 2022-nji ýylda şol toparlar ýene-de duşuşdylar, finalda «Ahal» topary has uly hasap bilen – 5:0 hasabynda ýeňiş gazandy. Baş tälimçi Mergen Orazow kluby Türkmenistanyň Kubogy ugrunda ýaryşda dördünji ýeňşine ýetirdi.
Döwlet derejeli «Arkadag» şäheriniň 2023-nji ýylyň aprelinde döredilen «Arkadag» topary üçin bu ikinji final bolar. Geçen ýyl bu topar Türkmenistanyň Kubogyny eýeledi, finalda ol iki gezek AFK-nyň Çempionlar ligasyna gatnaşan «Ahal» toparyny 3:0 hasabynda ynamly ýeňdi.
Şu ýyl «Arkadag» topary bilen «Ahal» topary eýýäm bäş gezek duşuşdylar. «Arkadag» topary bäş oýunda-da: Türkmenistanyň çempionatynda – 4:1, 4:0, 5:1, 2:1 we Türkmenistanyň Naýbaşy kubogy ugrundaky oýunda hem – 3:1 hasabynda ýeňiş gazandy.
2024-nji ýyldaky Türkmenistanyň Kubogy ugrundaky soňky oýun 23-nji dekabrda köpugurly «Aşgabat» stadionynyň merkezi meýdançasynda geçiriler.
