Türkmen döwlet binagärlik-gurluşyk institutynyň talyby Wepaly Halnyýazow nusgawy küşt boýunça 20 ýaşa çenli ýetginjekleriň arasynda geçirilen Türkmenistanyň çempionatynda ýeňiji boldy.
Ýaryş Aşgabadyň ýöriteleşdirilen küşt-şaşka mekdebinde geçirildi we guramaçylaryň iň pes baha derejesini 1400 utuk diýip belländigine garamazdan, 100-den gowrak küştçini bir ýere jemledi. Bu ýaryş gatnaşýanlaryň güýji boýunça ikinji ýaryş hasaplanýardy, sebäbi oňa 2024-nji ýylyň erkekler we zenanlar ýokary ligalarynyň oýunçylarynyň hemmesi diýen ýaly gatnaşdy.
Erkekler ýaryşynda esasy öňe saýlananlar geçen ýylky çempion, sport ussatlygyna dalaşgär Amanmuhammet Hommadow we wise-çempion, FIDE ussatlygyna kandidat Ahmet Gubataýewdi (ikisi-de aşgabatly, 2006-njy ýylda doglan). Olar iki tapgyrdan soň 100% netije gazandy, emma soňky oýunlarda käbir utuklaryny elden berdiler.
11 tapgyryň netijeleri boýunça Lebap küşt mekdebiniň okuwçysy Wepaly Halnýyazow 9 utuk gazanmak bilen, degişlilikde 2-nji we 3-nji orny eýelän Lebap welaýatynyň orta mekdebiniň okuwçysy Serdar Baýramowdan hem Türkmen döwlet bedenterbiýe we sport institutynyň talyby Amanmuhammet Hommadowdan ýarym utuk öňe geçdi. Hommadow yzly-yzyna iki gezek uly ýeňlişe sezewar bolandan soň, wagtynda özüni ele alyp, öňde barýanlaryň yzyndan ýetmegi başardy.
Geçen ýyl Budapeştde (Wengriýa) geçirilen 45-nji Bütindünýä küşt olimpiadasynda Wepaly Halnyýazowyň we Amanmuhammet Hommadowyň Türkmenistanyň erkekler ýygyndy toparynyň düzüminde «B» kategoriýada kiçi altyn medal gazanyp, umumy sanawda 188 toparyň arasynda 24-nji ýeri eýelemek bilen pellehana ýetendigini ýatladýarys. Serdar bolsa 2024-nji ýylyň ahyrynda 17 ýaşa çenli mekdep okuwçylarynyň arasynda Bangkokda (Taýland) geçirilen Aziýa çempionatynda kümüş medal gazandy.
Gyzlaryň arasynda geçirilen ýaryşda yzly-yzyna ikinji ýyl Ýagşygeldi Kakaýew adyndaky Halkara nebit we gaz uniwersitetiniň talyby Läle Şöhradowa birinji bolup, mümkin bolan 11 utukdan 9-syny gazandy. Şöhradowalaryň ýene biri, 18 ýaşly jigisi Leýla (Lebap) ondan ýarym utuk yza galdy. Baýrakçylaryň üçlüginiň soňky hataryny 8 utuk gazanan lebaply 17 ýaşly Gülmira Seýilhanowa eýeledi.
Ondan öň uýalar Läle we Leýla Şöhradowalar Türkmenistanyň zenanlar toparynyň düzüminde ýokarda ady agzalan Olimpiýa oýunlarynda «C» kategoriýada kiçi altyn medallara eýe bolup, umumy sanawda 169 toparyň arasynda 32-nji ýeri eýelediler. Gülmiranyň iň ýokary üstünligi 2023-nji ýylda Daşkentde (Özbegistan) 15 ýaşa çenli mekdep okuwçylarynyň arasynda rapid (çalt küşt) boýunça Aziýa çempionatynda gazanan kümüş medaly boldy.
Milli çempionatyň ýeňijileri 23-nji fewral – 9-njy mart aralygynda Petrowatsda (Çernogoriýa) geçiriljek ýetginjekler dünýä çempionatynda, şeýle hem Kolombo şäherinde (Şri-Lanka) geçiriljek Aziýa ýetginjekler çempionatynda ýurdumyzyň adyndan çykyş etmek hukugyna eýe boldular.
