Türkmenistanyň topary Merkezi Aziýa Futbol Assosiasiýasynyň (CAFA) futzal boýunça zenanlar toparlarynyň arasynda Duşenbede geçirilen çempionatda täjigistanly garşydaşlaryndan 1:0 hasabynda üstün çykmak bilen, üçünji tapgyrda ilkinji ýeňşini gazandy.
Bäsleşige Gyrgyzystandan, Eýrandan, Täjigistandan, Türkmenistandan we Özbegistandan bäş zenanlar topary gatnaşdy, olar aýlawly ulgam boýunça çempiony kesgitlärler.
Türkmenistanyň we Täjigistanyň milli ýygyndy toparlary ýüzbe-ýüz duşuşyga hiç bir ýeňişsiz geldiler. Biziň futzalçylarymyz ilkinji oýny gyrgyzystanly garşydaşlary bilen 1:1 hasabynda tamamladylar, ikinji oýunda bolsa Özbegistanyň toparyndan 3:6 hasabynda utuldylar. Açylyş tapgyryna gatnaşmadyk täjigistanly türgenler gyrgyz toparyndan 0:3 hasabynda utuldylar.
Ilkinji minutlardan başlap, türkmen futzalçylary oýnuň hörpüni ele aldylar we onuň birinji ýarymynda birnäçe gezek hasaby açyp bilerdiler. Ýöne her gezek top ýa täjik toparynyň derwezeçisine, ýa-da derwezäniň diregine degdi durdy. Şeýle-de bolsa, Kamil Mingazowyň şägirtleriniň erjelligi arakesmeden öň üstünlik getirdi. 12-nji minutda ildeşlerimiz topy burçdan oýna girizmäge hukuk aldylar. Çep ganatdan toparyň kapitany Mariýa Çaryýewa Wilnýusyň «Žalgiris» toparynyň düzüminde Litwa çempionatynyň ýokarky bölüminde ussatlygyny kämilleşdirýän Maýa Musatskaýa ajaýyp pas berdi, ol bolsa topy gelşine göni ýokarky burça urmak bilen, Türkmenistanyň toparyny öňe çykardy – 1:0.
Ondan soň iki toparyňam futzalçylarynda hasaby üýtgetmek üçin köp mümkinçilik boldy. Oýnuň soňky sekuntlarynda Täjigistanyň topary derwezeçini meýdan oýunçysy bilen çalşyranda, türgenlerimiz topy, hatda boş derwezä-de urdular. Emma top kese germewe degdi, netijede hasap üýtgewsiz galdy.
Oýnuň iň gowy oýunçysy diýlip ýeňiş getiren urgyny amala aşyran Maýa Musatskaýa ykrar edildi.
– Oýun dartgynlydy – diýip, Türkmenistanyň futzal boýunça zenanlar toparynyň baş tälimçisi Kamil Mingazow oýundan soňky söhbetdeşlikde duşuşygyň jemini jemledi. – Gyzlar tolgunýardylar, sebäbi tomaşaçylar tarapyndan goldanýan meýdança eýelerine garşy oýnamaly bolduk. Umuman aýdanyňda, oýun biziň üçin şowly boldy. Ýeňendigimize begenýäris. Elbetde, oýunda has köp gol salynmagyny islärdim. Ýeri, bolýar-da. Ýene-de jan ederis. Tutuş göreş öňde.
Bu ýeňişden soň 4 utugy bolan Türkmenistanyň topary üçünji oýunda gyrgyzystanly garşydaşlaryny 10:0 hasabynda ýeňen Eýran toparyndan 2 utuk yza galmak bilen, ikinji orny eýeledi.
Dördünji tapgyrda öňdäki toparlar duşuşarlar. Oýun gününiň başga bir oýnunda Özbegistanyň we Täjigistanyň milli ýygyndylary çykyş eder.
«CAFA Women’s Futsal Championship» ýaryşlary 2022-nji ýyldan bäri dördünji gezek geçirilýär. Ol 2022-nji we 2024-nji ýyllarda Duşenbede, 2023-nji ýylda bolsa Daşkentde geçirildi. Türkmenistanyň wekilleri CAFA çempionatyna ikinji gezek gatnaşýarlar. Geçen ýyl Duşenbe şäherinde geçirilen ýaryşda ildeşlerimiz Täjigistanyň toparyny utmak (4:1) bilen, diňe bir ýeňiş gazanyp, dördünji orny eýelediler. Öňki CAFA çempionatlarynyň hemmesinde Eýranyň futzal boýunça zenanlar topary ýeňiji bolupdy.
