«Arkadag» toparynyň futbolçylary Ahal welaýatynda dowam edýän Türkmenistanyň Futbol federasiýasynyň kubogy ugrunda ýaryşda üçünji gezek ýeňiş gazandylar.

Balkanabadyň «Nebitçi» toparyny 4:1 hasabynda, geçen ýylky milli çempionatynyň kümüş medalçysy «Ahal» toparyny 3:2 hasabynda utandan soň, Wladimir Baýramowyň oýunçylary Türkmenbaşynyň «Şagadam» toparyny 6:2 hasabynda ýeňlişe sezewar etdi. Ýeňijilerden Türkmenistanyň soňky üç çempionatynda iň köp pökgi geçiren Didar Durdyýew 16-njy we 51-nji we Şanazar Tirkişow 35-nji we 43-nji minutlarda iki pökgi geçirdiler. Begenç Akmämmedow 57-nji we Resul Hojaýew 63-nji minutlarda tapawutlandylar. «Şagadam» toparyndan Röwşen Baýlyýew 38-nji we Nurjan Japarow 89-njy minutlarda pökgi geçirdiler.

Bu ýeňişden soň «Arkadag» topary abraýly kubok ugrundaky göreşde ynamly öňdeligi dowam etdirip, 9 utuk toplady.

«Ahal» topary üçünji tapgyrda Balkanabadyň «Nebitçi» toparyny Gurbanmuhamet Esenowyň 32-nji we 57-nji hem-de Nurtagan Saryýewiň 70-nji minutlarda salan pökgüsi netijesinde 3:0 hasabynda ýeňip, iň öňde barýan topardan üç utuk yzda durýar. «Nebitçi» toparynyň oýunçysy Aşyrgeldi Saryýewiň 47-nji minutda alan iki sary kartoçkasy üçin meýdançadan çykarylmagy sebäpli oýny azlykda tamamlandygyny bellemek gerek.

«Merw» toparyny 2:0 hasabynda ýeňen «Aşgabat» topary 4 utuk bilen üçünji orna çykdy. Paýtagtyň klubyna Bäşim Gurbanberdiýewiň 55-nji we Sylap Goşşanowyň 90+3 minutlardaky salan pökgileri ýeňiş getirdi. Ýeňilenden soň «Merw» toparynyň 4 utugy galdy. «Şagadam» we «Nebitçi» toparlary 1 utuk bilen ýaryşda yzda barýarlar.

TFF-niň Kubogy – 2025 ýaryşynyň ähli oýunlarynyň Gökdepe etrabynyň Babarap geňeşliginde geçirilýändigini ýatladýarys.

TFF Kubogy – 2025 ýaryşynyň dördünji tapgyrynyň oýunlary 21-nji fewralda geçiriler. Şol gün «Nebitçi» – «Aşgabat», «Ahal» – «Şagadam» we «Arkadag» – «Merw» toparlary özara duşuşarlar.