Türkmenistanyň milli ýygyndy topary 14 ýaşa çenli oglanlaryň arasynda Aziýa-Okeaniýa zolagynda dünýä çempionatyna deslapky saýlama ýaryşynyň tapgyryny Bahreýn toparyny 3:0 hasabynda utmak bilen başlady. Bäsleşik Bahreýniň Isa-Taun şäherinde geçirilýär.
Aziýa tennis federasiýasy (ATF) bilen bilelikde Halkara tennis federasiýasynyň (ITF) howandarlygynda geçirilýän ITF World Junior toparlaýyn ýaryşyna 21 topar gatnaşýar. Olar 6 toparça bölünýärler.
Türkmenistanyň milli ýygyndy topary Bahreýniň we Siriýanyň ýygyndy toparlary bilen bilelikde «D» toparçada oýnaýar.
Beýleki toparlaryň düzümi:
«A» – Indoneziýa (1-nji belgi), Guam, Ýemen;
«B» – Gonkong (Hytaý), Mongoliýa, Iordaniýa;
«C» – Saud Arabystany, Nepal, Bangladeş;
«E» – Yrak, Liwan, Makao;
«F» – Filippinler, Malaýziýa, Maldiwler;
«G» – Gyrgyzystan, Birleşen Arap Emirlikleri, Oman.
Toparlaryň ýeňijileri 2025-nji ýylyň 9-njy aprelinden 14-nji apreline çenli Malaýziýada geçiriljek saýlama ýaryşlarynyň jemleýji tapgyrynda iki ýer üçin çärýek finalda bäsleşmegi dowam etdirerler.
ITF World Junior saýlama ýaryşynda Türkmenistanyň milli ýygyndy toparynda ýaş olimpiýaçylaryň okuw mekdebiniň 8-nji synp okuwçysy, 14 ýaşa çenli tennisçileriň arasynda Dohada (Katar) geçen öten ýylky 3-nji Aziýa ýetginjekler ýaryşynyň ýeňijisi Aly Geldiýew, Aşgabat şäherindäki A.S.Puşkin adyndaky umumy orta bilim berýän bilelikdäki türkmen-rus mekdebiň 8-nji synp okuwçysy, 2024-nji ýylda 14 ýaşa çenli ýetginjekleriň arasynda tennis boýunça geçirilen «Ashgabat Open 2024» halkara ýaryşynyň jübütleýin bäsleşikleriniň ýeňijisi Kerimgeldi Guldurdyýew, Aşgabat şäherindäki ýöriteleşdirilen 86-njy orta mekdebiň 8-nji synp okuwçysy, 2024-nji ýylda Katarda, Aşgabatda we Saud Arabystanynda geçirilen üç halkara ýaryşynda ýekeleýin bäsleşiklerde kümüş medal gazanan Süleýman Hudaýberdiýew dagy çykyş edýärler.
Ýaryşyň ýer eýelerine – Bahreýn tennisçilerine garşy birinji duşuşyk ildeşlerimiz üçin kän bir kynçylyk döretmedi. Ýekeleýin görnüşde geçirilen ýaryşyň ilkinji duşuşygynda Kerimgeldi Guldurdyýew Nasser Salmany 6:3, 6:1 hasabynda utdy. Ikinji duşuşykda Aly Geldiýew Ali Basel Alhaýýaty ynamly ýeňdi we oňa diňe iki döw berdi – 6:0, 6:2. Toparlaýyn ýeňiş üçin indi kän bir ähmiýeti bolmadyk jübütleýin görnüşde geçirilen ýaryşda bolsa Kerimgeldi Guldurdyýew bilen Süleýman Hudaýberdiýew, Abdylla Aldoseri bilen Nasser Salmany 6:0, 6:1 hasabynda utdylar.
Indiki duşuşykda tennisçilerimiz üçünji belgi astynda çykyş edýän Siriýanyň topary bilen bäsleşer.
ITF World Junior toparlaýyn ýaryşy 14 hem-de 16 ýaşa çenli gyzlaryň we oglanlaryň arasynda iki ýaş toparynda geçirilýär. Ýaryşlaryň ikisi-de ýaş tennisçilere halkara ýaryşlarynda özlerini synap görmäge we öz ýurdunyň adyndan çykyş edýärkä, toparlaýyn oýnamagyň täsin duýgusyny başdan geçirmäge mümkinçilik berýär.
Ýaňy-ýakynda Bahreýniň Isa-Taun şäherindäki şu meýdançalarda geçirilen Türkmenistanyň milli ýygyndy topary 14 ýaşa çenli gyzlaryň arasynda Aziýa-Okeaniýa zolagynda ITF World Junior dünýä çempionatyna deslapky saýlama ýaryşynda bu ýaryşlara gatnaşan ýyllarynyň iň gowy netijesini görkezmek bilen, 18 toparyň arasynda bäşinji orny eýeländigini ýatladýarys.
Bahreýnde geçirilen ýaryşda Türkmenistanyň gyzlar ýygyndysyna paýtagtymyzdaky Türkmenistanyň Gahrymany Atamyrat Nyýazow adyndaky 43-nji zehinli ýaşlar mekdebiň 8-nji synp okuwçysy Aýlar Kakabaýewa, Aşgabat şäherindäki 87-nji orta mekdebiň 6-njy synp okuwçysy Näzli Hudaýgulyýewa we Aşgabat şäherindäki 90-njy orta mekdebiň 6-njy synp okuwçysy Sähra Garahanowa wekilçilik etdiler.
