Isa-Taun şäherinde geçirilen (Bahreýn) 14 ýaşa çenli oglanlaryň arasynda Aziýa-Okeaniýa zolagynda ITF World Junior dünýä çempionatyna deslapky saýlama ýaryşynda Türkmenistanyň topary dört gezek utup, bir oýunda utulyp, 21 toparyň arasynda sekizinji orna düşdi.

Türkmenistanyň milli ýygyndysyna ýaş olimpiýaçylaryň okuw mekdebiniň 8-nji synp okuwçysy Aly Geldiýew, Aşgabat şäherindäki A.S.Puşkin adyndaky umumy orta bilim berýän bilelikdäki türkmen-rus mekdebiň 8-nji synp okuwçysy Kerimgeldi Guldurdyýew, Aşgabat şäherindäki ýöriteleşdirilen 86-njy orta mekdebiň 8-nji synp okuwçysy Süleýman Hudaýberdiýew wekilçilik etdiler.

Birinji tapgyrda ildeşlerimiz «D» toparçada Bahreýniň toparyndan 3:0 hasabynda üstün çykyp, üçünji belgili Siriýanyň toparyndan – 1:2 hasabynda ýeňlişe sezewar bolup, ikinji ýeri eýelediler.

7 toparyň arasynda 8-14 ýer ugrundaky duşuşyklarda türkmen tennisçileri Omandan gelen deň-duşlaryny 3:0 hasabynda ýeňdiler, soňra 2:1 hasabynda Saud Arabystanyň we Malaýziýanyň toparlaryndan üstün çykdylar.

Malaýziýalylar bilen soňky duşuşykda ildeşlerimiz erjel oýnadylar. Ýekeleýin ýaryşyň birinji duşuşygynda utulan toparymyz ikinjide 1:1 hasabynda oýny deňledi, jübütleýin ýaryşda bolsa ýeňiş gazandy. Aly Geldiýew «Ashgabat Open 2024» halkara ýaryşynyň ýarym finalçysy Jeýkob Ýon Sern Wongy – 6:1, 6:3 hasabynda ýeňlişe sezewar edip, topara birinji utuk getirdi, ol soňra Kerimgeldi Guldurdyýew bilen bilelikde Fawwaz Mustakim Kamaruzamany bilen «Ashgabat Open 2024» halkara ýaryşynyň bürünç medalynyň eýesi Garet Limi – 6:3, 6:3 hasabynda ýeňdi.

Şeýlelik bilen, türkmen tennisçileri Aziýa-Okeaniýa zolagynda ITF World Junior dünýä çempionatyna deslapky saýlama ýaryşynda çykyşyny tamamladylar, bu ýaryşlara gatnaşan ýyllarynda gowy netije görkezdiler. Toparyň üstünligine Dohada (Katar) 14 ýaşa çenli tennisçileriň arasynda geçen, öten ýylky 3-nji Aziýa ýetginjekler ýaryşynyň ýeňijisi Aly Geldiýew uly goşant goşdy, ol ýekeleýin ýaryşlaryň ählisinde, şol sanda U14 toparynda Aziýada iň güýçli alty tennisçiniň biri bolan siriýaly Muhamad Eýad Salimden hem – 3:6, 7:6 (5), 6:4 hasabynda üstün çykdy. 

14 ýaşa çenli türgenleriň arasynda «Ashgabat Open 2024» halkara ýaryşynyň jübütleýin ýaryşynda ýeňiji bolan Kerimgeldi Guldurdyýew, şeýle hem 2024-nji ýylda 14 ýaşa çenli türgenleriň arasynda Katarda, Aşgabatda we Saud Arabystanynda geçirilen halkara ýaryşlarynyň kümüş baýragynyň eýesi Süleýman Hudaýberdiýew meýdançada erjel göreşdiler. 

 ITF World Junior dünýä çempionatyna deslapky saýlama ýaryşyna türkmen tennisçileri şahsy tälimçileriniň we Türkmenistanyň ýygyndysynyň kapitany Ýuriý Rogusskiniň ýolbaşçylygynda taýýarlandylar. Aly Geldiýew Türkmenabat şäherindäki 9-njy sport mekdebinde Babamyrat Mamatrasulowyň ýolbaşçylygynda tennis oýnap başlady. Indi ol Ýu.Rogusskiniň elinde ussatlygyny kämilleşdirýär. Kerimgeldi Guldurdyýew Hajymyrat Çaryýewden, Süleýman Hudaýberdiýew bolsa Gurbanberdi Gurbanberdiýewden tälim alýarlar.

Finalda Indoneziýanyň we Gonkongyň toparlary duşuşdylar, olar 2025-nji ýylyň 9-14-nji apreli aralygynda  Malaýziýada geçiriljek saýlama ýaryşlarynyň jemleýji tapgyrynda çykyş etmäge hukuk gazandylar. Duşuşyk 2:0 hasabynda gonkongly tennisçileriň haýryna tamamlandy. 3-nji orun ugrundaky duşuşykda Bangladeşiň topary Siriýanyň toparyny 2:1 hasabynda ýeňdi.

ITF World Junior toparlaýyn ýaryşy iki ýaş toparynda – 14 we 16 ýaşa çenli gyzlaryň hem oglanlaryň arasynda geçirilýär. Iki ýaryş hem ýaş tennisçilere halkara ýaryşlarynda özüni synamaga we öz ýurduna wekilçilik edýän toparlaýyn oýnunyň täsin ruhuny duýmaga mümkinçilik berýär. 

Ýaňy-ýakynda Türkmenistanyň milli ýygyndy topary Bahreýniň Isa-Taun şäherindäki şu meýdançalarda geçirilen 14 ýaşa çenli gyzlaryň arasynda Aziýa-Okeaniýa zolagynda ITF World Junior dünýä çempionatyna deslapky saýlama ýaryşynda 18 toparyň arasynda bäşinji orny eýeländigini, bu ýaryşlara gatnaşan ýyllarynyň içinde iň gowy netije görkezendigini ýatladýarys.

Bahreýnde geçirilen ýaryşda Türkmenistanyň gyzlar milli ýygyndysyna paýtagtymyzdaky Türkmenistanyň Gahrymany Atamyrat Nyýazow adyndaky 43-nji zehinli ýaşlar mekdebiň 8-nji synp okuwçysy Aýlar Kakabaýewa, Aşgabat şäherindäki 87-nji orta mekdebiň 6-njy synp okuwçysy Näzli Hudaýgulyýewa we Aşgabat şäherindäki 90-njy orta mekdebiň 6-njy synp okuwçysy Sähra Garahanowa wekilçilik etdiler.