Ýagşygeldi Kakaýew adyndaky Halkara nebit we gaz uniwersitetinde mugallymlar üçin «Lu Banyň ussahanasy» atly taslamasynyň çäklerinde guralýan hünär ýokarlandyryş okuwlarynyň açylyş dabarasy geçirildi.

Çärä Türkmenistanyň Bilim ministrliginiň, Hytaý Halk Respublikasynyň Kommunistik partiýasynyň Şensiý welaýat komitetiniň, Hytaý Halk Respublikasynyň Türkmenistandaky ilçihanasynyň, CNPC hytaý kompaniýasynyň Türkmenistandaky şahamçasynyň, Sian nebit uniwersitetiniň, Hebeý nebit hünär-tehniki uniwersitetiniň we Şensiý hünär-tehniki kollejiniň wekilleri gatnaşdylar.

Hytaý Halk Respublikasynyň wekiliýeti Ýagşygeldi Kakaýew adyndaky Halkara nebit we gaz uniwersitetiniň düzümi, onuň okuw binalary, ylmy-barlag we okuw merkezleri, barlaghanalary, hünärleri we okuwyň ugurlary, ýokary okuw mekdepdäki ylmy barlaglar bilen tanyşdyryldy.

Çäräniň çäklerinde oňa gatnaşyjylaryň iş maslahaty geçirilip, onuň dowamynda «Lu Banyň ussahanasy» atly taslamasy boýunça hyzmatdaşlyk etmegiň wezipesine garaldy. Hususanda, Lu Ban ussahanasynyň meýdançasynda gurluşyk-gurnama işleri, onuň barlaghana enjamlary bilen enjamlaşdyrylmagy, «Gazylyp alynýan peýdaly magdanlaryň geologiýasy we gözlegi» hem-de «Maglumat ulgamlary we tehnologiýalary (nebit-gaz pudagynda)» diýen ugurlar boýunça uniwersitetiň mugallymlarynyň hünär ýokarlandyryş okuwlaryna başlamaga taýýarlyk baradaky meseleler maslahatlaşyldy.

Şeýle hem bilelikdäki okuw maksatnamasy boýunça Sian nebit uniwersitetiniň magistraturasynda okamak üçin türkmen ýokary okuw mekdebiniň 2025-nji ýyldaky zehinli uçurym talyplaryny saýlap-seçmek we kabul etmek meselelerine üns berildi.

Türkmenistanda «Lu Banyň ussahanasy» atly taslamasyny öňe ilerletmek baradaky başlangyjyň 2023-nji ýylyň ýanwar aýynda Pekinde geçirilen gepleşikleriň netijeleri boýunça Türkmenistanyň Prezidenti Serdar Berdimuhamedow we Hytaý Halk Respublikasynyň Başlygy Si Szinpin tarapyndan gol çekilen Bilelikdäki Beýannamada beýan edilendigini bellemek gerek.

2024-nji ýylyň oktýabrynda Hytaý Halk Respublikasynyň Sian şäherinde Ýagşygeldi Kakaýew adyndaky Halkara nebit we gaz uniwersitetiniň hem-de Sian nebit uniwersitetiniň, Hebeý nebit hünär-tehniki uniwersitetiniň, Hytaýyň CNPC milli nebitgaz korporasiýasynyň, Hytaýyň bilim ulgamynda halkara alyş-çalyş assosiasiýasynyň arasynda Türkmenistanda «Lu Banyň ussahanasy» döretmek boýunça özara düşünişmek hakynda bäştaraplaýyn Ähtnama gol çekildi. 

Lu Banyň ussahanasynyň ady rowaýata öwrülen gadymy hytaý oýlap tapyjysynyň hormatyna atlandyrylandygyny belläp geçmek gerek. Hytaýda dörän Lu Banyň ussahanalar ulgamy bütin dünýäde meşhurlyga eýe boldy. Şeýle ussahanalar Aziýanyň, Ýewropanyň we Afrikanyň ýigrimiden gowrak ýurtlarynda üstünlikli hereket edýär. Biziň günlerimizde Lu Banyň ussahanalary ylym we hünär bilimi ulgamynda halkara alyşmalar we hyzmatdaşlyk üçin meýdança döreden uly taslama görnüşindedir.

Lu Banyň ussahanasynyň Türkmenistanda döredilmegi köp babatda ýokary derejeli hünärmenleri, inženerleri, innowasion tehnologiýalaryň depginli ösýän şertlerinde çuňňur bilimlere, hünär başarnyklaryna eýe bolan tehnologlary taýýarlamaga ýardam eder.