«Arkadag» toparynyň futbolçylary şu gün finalda Kambojanyň «Svay Rieng» klubundan 2:1 hasabynda üstün çykyp, 2024/25 ýyl AFK Çagyryş ligasynyň kubogyny gazandy.
Oýun Pnompende 60000 tomaşaçy üçin niýetlenen hyryn-dykyn doly «Morodok Techo» stadionynda geçirildi.
Oýnuň birinji ýarymynda «Arkadag» toparynyň birinji pökgini tora girizmegi üçin ýarym sagat gerek boldy. Didar Durdyýew jerime meýdançasynyň daşyndan urdy, ýöne top derwezäniň üstünden geçip gitdi.
Ýene az salymdan Şanazar Tirkişow çep tarapdan jerime meýdançasyna girdi, ýöne derwezeçi Wireak Dara onuň urgusynyň hötdesinden geldi.
Toparlar arakesmä nol-nol hasapda deňlik bilen çykdylar.
Oýnuň ikinji ýarymynyň birinji çärýeginiň ahyrynda myhmanlar pökgini oýna burçdan girizmäge hukuk gazanyp, şonuň bilen-de hasaby açdylar. Ýagny 59-njy minutda Şanazar Tirkişow topy ussatlarça Mekan Saparowa geçirdi, ol bolsa kellesi bilen urup, «Arkadag» toparyny öňe çykardy – 1:0.
Ikinji ýarymyň ahyryna çenli galan wagtda ýer eýeleri jogap topuny geçirmek üçin, köp tagalla etdiler we ahyrda muny başardylar. 82-nji minutda «Svay Rieng» toparynyň oýunçylary pökgini sag burçdan oýna saldylar, yzysüre pökgi jerime meýdançasyna geçirildi we hemmeden ýokary böken Saret Kria kellesi bilen pökgini tora girizdi - 1:1.
Bu hasap esasy wagtyň ahyryna çenli üýtgemedi, netijede toparlar goşmaça 30 minut oýnamaly boldular.
Goşmaça wagtda bagt meýdança eýelerinden ýüz öwürdi. 101-nji minutda ikinji ýarymda oýna giren Min Ratanak pökgi bilen derwezäniň dik söýesini urdy. Türkmen futbolçylary bolsa gol salmak üçin özlerine berlen pursatdan şowly peýdalandylar. 112-nji minutda Arzuwguly Sapargulyýew meýdançanyň jümmüşinden uzak aralyga urup, Altymyrat Annadurdyýewi derwezä çykardy, ol bolsa goragçydan geçip, derwezeçi bilen ýeke-ýekä çykdy hem-de uzak burça takyk urdy. Şu-da ýeňiş goly boldy.
Sylaglama dabarasynda «Arkadag» toparyna 2024/25 ýyl AFK Çagyryş ligasynyň kubogy gowşuryldy, onuň tapawutlanan iki oýunçysy – Altymyrat Annadurdyýew bilen Şanazar Tirkişow bolsa aýratyn baýraklar bilen sylaglandy.
Şeýlelik bilen, «Arkadag» topary 2013-nji ýylda «Balkanyň», 2014-nji ýylda bolsa AFK-nyň prezidentiniň kubogynda MTTU alandan soň, yklym Kubogyny alan üçünji türkmen kluby boldy.
AFK Çagyryş ligasy Aziýanyň klub derejesinde ähmiýeti boýunça üçünji ýaryşydyr. Oňa AFK Çempionlar ligasy we AFK Çempionlar ligasy 2-den has pes derejedäki toparlar gatnaşýarlar. Ol futbol zehinlerini görkezmäge hyjuwdan doly toparlar üçin döredilipdi.
