Türkmenistanyň futzal boýunça Naýbaşy ligasynyň «Balkan» tapgyry Türkmenbaşy şäherinde 5-nji tapgyryň oýunlary bilen başlandy.

Ýaryşyň esasy oýnunda şu möwsümde öňdäki orunlary eýeleýän – «Senagatbank» bilen «Köpetdag» toparlary duşuşdy. Duşuşyk diýseň öndümli boldy – pökgi derwezelere 14 gezek girdi. Şol oýunda üstünlik Türkmenistanyň häzirki çempiony «Köpetdag» toparynyň tarapynda boldy, – ol 8:6 hasabynda ýeňiş gazandy.

Bu ýeňişden soň Türkmenistanyň Içeri işler ministrliginiň topary 12 utuk toplap, ýaryş sanawynyň birinji hataryna gaýdyp geldi, 10 utugy bolan «Senagatbank» topary bolsa ikinji orna düşdi.

5-nji tapgyryň beýleki iki oýnunyň ikisi-de 1:0 hasabynda tamamlandy. Şu netije bilen «Ahal» topary «Migrasiýa» toparyny utdy, ýurduň öňki çempiony «Deňizçi» topary bolsa Balkan «bäsleşiginde» TNGIZT-iň toparyny utdy.

Birinji aýlawdan soň 3-4-nji orunlary 7 utuk toplan «Ahal» bilen «Migrasiýa» toparlary paýlaşýar. Ýaryş sanawynyň ahyrky hataryny, degişlilikde 4 we 3 utugy bolan «Deňizçi» topary bilen TNGIZT-iň topary eýeleýär.

Türkmenistanyň futzal boýunça Naýbaşy ligasynyň 6-njy we 7-nji tapgyrynyň oýunlary-da Türkmenbaşy şäherinde geçiriler.