Türkmen küştçüleri Täjigistanyň Duşenbe şäherinde geçirilen Günbatar Aziýa ýaşlar çempionatynda bir altyn we dört bürünç medal bolmak bilen, jemi bäş medal gazandylar.

Türkmenistanyň Küşt federasiýasynyň beren habaryna görä, bäsleşige 12 ýurtdan 200-den gowrak adam gatnaşypdyr, olar 8, 10, 12, 14, 16 we 18 ýaşdan uly bolmadyk ýaş toparlarynda iň güýçli diýen ada dalaş edipdirler. Türkmenistanyň adyndan ýokary netijeleri görkezen 17 sany zehinli küştçi çykyş edipdir.

18 ýaşdan geçmedik gyzlaryň arasynda geçen blis ýaryşynda iň ýokary baýraga ýurdumyzyň iň tejribeli küştçüleriniň biri Leýla Şöhradowa (2029 reýting) mynasyp boldy. Lebap welaýatynyň Dänew etrabyndaky 31-nji orta mekdebiň 18 ýaşly 12-nji synp okuwçysy sekiz oýunda ýeňiş gazanyp, bir oýny deňme-deň oýnap, 8,5 utuk toplamak bilen, hormat münberiniň iň ýokary gatyna çykdy.

8 ýaşdan uly bolmadyk oglanlaryň arasynda geçen blis ýaryşynda bürünç medaly Aşgabat şäherinde ýaşaýan Çaryhekim Çaryýew (1732 reýting) gazandy.

10 ýaşdan geçmedik oglanlaryň arasynda nusgawy küşt, rapid we blis boýunça geçen toparlaýyn ýaryşlarda ýene üç bürünç medaly Maksat Öwlüýägulyýew (reýting 1739), Myrat Merdanow (reýting 1803) we Didar Hupbyýew (reýting 1613) dagy gazandy.