2027-nji ýyldaky Aziýa Kubogy ýaryşynyň saýlama oýunlarynda Taýland bilen duşuşyga iki hepde galanda Türkmenistanyň milli ýygyndy toparyna täze baş tälimçi bellenildi. Ol 42 ýaşly hünärmen, PRO kategoriýaly ýokary hünär tälimçilik ygtyýarnamasynyň eýesi, sport ussady Röwşen Meredowdyr. Türkmenistanyň Futbol federasiýasy onuň bu wezipä bellenendigini habar berdi.
Türkmenistanyň milli ýygyndy toparynyň baş tälimçisi hökmünde R.Meredow Aziýa Kubogy saýlama oýunlarynda myhmançylykda Hytaý Taýbeýiniň toparyny 2:1 hasabynda ýeňip, türkmen futbolçylarynyň 2023-nji ýyldan bäri resmi oýunlarda bir ýeňiş gazanan toparyna Mergen Orazowyň ornuna geldi.
Röwşen Meredow Balkanabatda çagalar we ýaşlar sport mekdebiniň tälimçisi Waleriý Rewazowiç Skitişwiliniň toparynda futbol oýnap başlady. Soňra ýokary liganyň «Nebitçi», «Dagdan», «Galkan», «Ahal» we HTTU-nyň toparlarynda çykyş etdi.
2003-nji ýylda Magtymguly adyndaky Türkmen döwlet uniwersitetini hukukçy-ýurist hünäri boýunça hukuk fakultetini tamamlady.
2013-nji ýylda futbol oýnamagyny goýandan soň tälimçilige geçdi.
R.Meredowyň ýolbaşçylygynda HTTU-nyň topary 2014-nji ýylda Aziýa toparlarynyň ähmiýeti boýunça üçünji derejeli ýaryşy – AFK-nyň prezidentiniň Kubogyny eýeledi, «Ahal» topary bolsa 2017-nji ýylda Türkmenistan Kubogyny, şeýle hem milli çempionatda üç gezek kümüş medal gazandy.
2020-nji ýylda Daşkentde iki ýyl töweregi okandan soň, Röwşen Meredow dünýäniň islendik ýurdunda klub we milli ýygyndy toparlara tälim bermek hukugyny berýän PRO kategoriýasynyň ýokary hünär ygtyýarnamasyny almak üçin FIFA we AFK tarapyndan ykrar edilen diplomyny üstünlikli gorady. Şondan soň daşary ýurtlarda işläp, tejribe edindi. 2020-nji ýylda Özbegistanyň «Gyzylkumyna», 2022-nji ýylda Gyrgyzystanyň «Kaganatyna» tälim berdi.
2025-nji ýylyň başyndan Röwşen Meredow Türkmenistanyň Futbol federasiýasynyň tehniki bölümine ýolbaşçylyk edýär, ol çagalar, zenanlar, köpçülikleýin futbol, şeýle hem futzal we tälimçilik bilimini ösdürmek bilen meşgullanýar. 2020-nji ýyldan bäri «Arsenal» toparynyň öňki baş tälimçisi Arsen Wengeriň ýolbaşçylygyndaky ählumumy futbol ösüşi taslamasynda FIFA-nyň tehniki hünärmeni bolup işleýär.
Indi Röwşen Meredowyň öňünde çylşyrymly wezipe dur – Türkmenistanyň milli ýygyndy toparyny 2027-nji ýylda Saud Arabystanynda geçiriljek Aziýa Kubogy ýaryşyna çykarmaly. Munuň üçin «D» toparçada Taýlandyň, Hytaý Taýbeýiniň we Şri-Lankanyň toparlarynyň arasynda birinji orny eýelemeli.
Öň türkmen futbolçylarynyň diňe Aziýa kubogynyň soňky tapgyryna iki gezek gatnaşandygyny ýatladýarys. Ilkinji gezek – 2004-nji ýylda Hytaýda, ikinji gezek bolsa 2019-njy ýylda Birleşen Arap Emirliklerinde geçirilen ýaryşa gatnaşdylar. Geçen ýaryşda Türkmenistanyň milli ýygyndy topary «E» saýlama toparçada 3-nji ýeri eýeledi we 2023-nji ýylda Katarda geçirilen Aziýa Kubogy ýaryşynyň soňky tapgyryna çykmady.
Taýlandyň topary bilen 10-njy iýunda Aşgabatda boljak möhüm duşuşyga taýýarlyga juda wagtyň azdygyna garamazdan, Türkmenistanyň milli ýygyndy toparynyň täze baş tälimçisi ruhdan düşmeýär.
Röwşen Meredow:
– Men öňümdäki jogapkärçilige doly düşünýärin. Biziň wezipämiz ýeňil däl, biz ony çözmek üçin ähli tagallalary ederis. Öz gezegimde, işime biperwaý garamajakdygyma söz berip bilerin. Toparymda işiň hatyrasyna tagallasyny gaýgyrmajak hünärmenler bar. Onda milli ýygyndyda oýnan, futbola meniňkä meňzeş garaýyşly adamlar bar. Olar hem topara kömek etmek isleýän adamlar. Bu nukdaýnazardan janköýerleriň goldawyna bil baglaýarys – diýdi.
R.Meredowyň aýdyşy ýaly, türkmen milli ýygyndysynyň tälimçiler topary häzirki wagtda dalaşgärleri saýlamak üçin milli çempionatyň ähli duşuşyklaryna syn edýär. Arakesmeden öň soňky duşuşyklardan soň, Taýland bilen duşuşyga taýýarlyk görmek üçin 1-nji iýunda Aşgabatda türgenleşige başlajak milli ýygyndy toparynyň düzümi yglan ediler. Şunuň bilen birlikde garşydaşymyz hakda maglumat ýygnalýar we Taýlandyň milli ýygyndy toparlarynyň oýunlaryna wideo sekiliň üsti bilen syn edilýär.
– Taýlandyň ýygyndy topary juda guramaçylykly topar – diýip, R.Meredow aýdýar. – Şri-Lanka bilen saýlama oýnuna syn etdim we bu toparlaryň bir ýerde durmaýandygyny aýtmalydyryn. Taýlandyň milli ýygyndy toparyna çalt futbolyň başarnykly utgaşmasyny ornaşdyran ýapon hünärmeni tälim berýär. Dünýä çempionatyna gatnaşyp bilmedik we Aziýa Kubogyna gatnaşmak ugrunda göreşýän toparlaryň arasynda Taýlandyň topary iň güýçli toparlardan biridir. Şonuň üçinem, onuň bijede ilkinji sebede düşmegi tötänden däldi – diýip, R.Meredow pikir edýär.
R.Meredow sözüni dowam etdirip, şeýle diýdi: Indiki garşydaşymyz – Şri-Lankanyň topary barada aýdylanda bolsa, onuň hatarynda bu ýurda ornaşan başarnykly futbol oýnaýan ýewropalylar bar. Diýmek, 2027-nji ýylda Aziýa Kubogyna gatnaşmaga hukuk gazanmak ugrunda göreşde hiç topara kembaha garamaly däl. Toparçada gowşak topar ýok. Her duşuşyk final duşuşygy ýaly bolar.
