Türkmenistanly türgenler Gyrgyz Respublikasynyň paýtagty Bişkekde başlanan WKF karate boýunça Merkezi Aziýanyň 10-njy çempionatynyň birinji gününde jemi 7 – iki altyn, iki kümüş we üç bürünç medal eýelediler.

Bäsleşige bäş ýurtdan 609 türgen gatnaşýar, olar ýaryşyň kata (görkezme maşklary) we kumite (tutluşyklar) görnüşlerinde dürli ýaş aýratynlyklary boýunça medallar ugrunda göreşýärler.

Türkmenistanyň Karatedo federasiýasynyň habaryna görä, ýaryşy geçiriji ýurt hökmünde Gyrgyzystana – 238, Gazagystana – 218, Özbegistana – 112, Täjigistana – 5 we ýurdumyza 36 türgen wekilçilik edýärler.

Çempionatyň birinji gününde ildeşlerimiz medallary ýaryşyň kata görnüşinde eýelediler.

Iň ýokary baýraklary Mary welaýatynyň Baýramaly etrabyndaky 11-nji orta mekdebiň 5-nji synp okuwçysy Abdyresul Gylyjow (12 ýaşa çenli oglanlaryň arasynda, tälimçisi S.Muhammetnazarow) we Aşgabat şäherindäki 52-nji ýöriteleşdirilen orta mekdebiň 10-njy synp okuwçysy Allanur Ýalkabow (17 ýaşa çenli ýetginjekleriň arasynda, tälimçisi B. Ýalkabow) gazandylar.

Ahal welaýatynyň Gökdepe etrabyndaky 1-nji ýöriteleşdirilen orta mekdebiň okuwçysy Öwezmyrat Sapadurdyýew (14 ýaşa çenli oglanlaryň arasynda, tälimçisi S.Setdarow) we Aşgabat şäherindäki 55-nji orta mekdebiň 11-nji synp okuwçysy Dawut Saryýew (17 ýaşa çenli ýetginjekleriň arasynda, tälimçi B.Ýalkabow) kümüş medal gazandylar. Olaryň ikinjisi, WKF-iň düzgünlerine laýyklykda, uly ýaşly türgenleriň arasynda (18 ýaşdan uly) bäsleşige goýberildi we ýene bürünç medal hem gazandy.

Bürünç medallary Mary welaýatynyň Baýramaly şäherindäki 18-nji orta mekdebiň 6-njy synp okuwçysy Muhammetresul Haýrullaýew (14 ýaşa çenli oglanlaryň arasynda, tälimçi S.Muhammetnazarow) we Türkmenistanyň Daşary işler ministrliginiň Halkara gatnaşyklary institutynyň 2-nji ýyl talyby Resul Atajanow (18 ýaşdan ulularyň arasynda, tälimçisi B.Ýalkabow) eýelediler.

Ýaryş dowam edýär.