Türkmenistanyň ýaşlar ýygyndysynyň futbolçylary Iordaniýanyň paýtagtynda başlanan 2026-njy ýylda 23 ýaşa çenli ýaşlaryň arasynda geçiriljek Aziýa Kubogynyň saýlama tapgyrynda Hytaý Taýpeýiniň ýygyndysyny 5:1 hasabynda utup, uly ýeňiş gazandylar.
Amman şäheriniň halkara stadionynda geçirilen duşuşygyň gahrymany Aşgabadyň «Köpetdag» toparynyň hüjümçisi Daýanç Meredow ýeňiş getiren gollaryň üçüsini (19-njy, 43-nji we 48-nji minutlar) geçirip tapawutlandy. Şeýle hem, «Altyn asyr» toparynyň futbolçylary Söhbet Durdyýew (32-nji minut) we Abdyrahman Annamyradow (90+2) hersi bir pökgi geçirdiler. Garşydaşlaryň ýeke-täk pökgüsini bolsa Weý Çi-Çuan (40-njy minut) geçirdi.
Bu duşuşyk, Türkmenistanyň we Hytaý Taýpeýiniň ýaşlar ýygyndylarynyň arasynda geçirilýän ikinji resmi duşuşyk boldy. Iki ýyl mundan ozal Indoneziýanyň Surakarta şäherinde 23 ýaşa çenli ýaşlaryň arasynda geçirilen Aziýa Kubogynyň saýlama ýaryşynda hem Türkmenistanyň ýygyndysy 4:0 hasabynda ýeňiş gazanypdy.
Bu gezekki duşuşyk hem türkmen futbolçylarynyň aýratyn artykmaçlygy bilen geçdi. Ahmet Agamyradowyň şägirtleri ilkinji minutlardan başlap garşydaşyň meýdançasynda has ýygy-ýygydan peýda bolup başladylar. Duşuşygyň 19-njy minudynda derwezeçi Kakageldi Berdiýew uzak aralykdan pökgüni Daýanç Meredowa geçirip, ol hem öz gezeginde takyk urgusy bilen hasaby açdy.
13 minutdan soň, Arslan Saparowyň sag tarapdan geçiren pökgüsini kabul eden Söhbet Durdyýew jerime meýdançasynyň ortasynda pökgüni aýlap, çep aýagy bilen derwezä geçirdi – 2:0.
40-njy minutda Weý Çi-Çuan jerime meýdançasynyň daşyndan owadan urgusy bilen aratapawudy 2:1 hasap bilen azaltdy. Emma bu hem uzaga çekmedi. Üç minutdan soň, Magtymberdi Berenowyň çep tarapdan geçiren pökgüsini Daýanç Meredow derwezä golaý ýerde bir degmede tamamlap, hasaby 3:1-e ýetirdi. Duşuşygyň birinji ýarymy şu hasap bilen tamamlandy.
Ikinji ýarymyň başynda Daýanç Meredow ilkinji geçiren pökgüsi ýaly garşydaş goragçysyny ýeňip geçip, aşaky çep burça dürs urgy bilen hasaby 4:1 etdi. Duşuşygyň goşmaça wagtynda bolsa, Abdyrahman Annamyradow sag burçdan berlen urgusyndan soň pökgüni kellesi bilen derwezä girizdi.
«A» toparçadaky beýleki duşuşykda bolsa Iordaniýanyň ýaşlar ýygyndysy Butanyň ýygyndysyny 11:0 (ilkinji ýarymda 4:0) hasabynda ýeňdi we Türkmenistanyň ýygyndysy bilen bilelikde 3 utuk bilen öňdeligi eýeledi.
Indiki tapgyrda duşuşyklar şeýle bolar: Türkmenistanyň we Butanyň, Iordaniýanyň we Hytaý Taýpeýiniň ýygyndylary duşuşarlar.
Ýatladyp geçsek, Aziýa Kubogy – 2026-nyň saýlama tapgyrynda ýaşlar ýygyndylarynyň 44-si toparçalaryň 11-sinde bäsleşýärler. Toparçalaryň ýeňijileri, şeýle hem ikinji orny eýelänleriň arasynda iň gowy ýygyndylaryň 4-si, 2026-njy ýylyň 7 – 25-nji ýanwary aralygynda Saud Arabystanynda ilkinji gezek geçiriljek Aziýa Kubogynyň final tapgyryna gatnaşmak hukugyny gazanarlar.
Beýleki toparçlardaky 1-nji tapgyryň netijeleri:
«B» toparça (duşuşyklar Mýanmada geçirilýär): Kuweýt – Mýanma – 0:0, Ýaponiýa – Owganystan – 3:0
«C» toparça (duşuşyklar Wýetnamda geçirilýär): Ýemen – Singapur – 2:1, Wýetnam – Bangladeş – 2:0
«D» toparça (duşuşyklar Hytaýda geçirilýär): Awstraliýa – Demirgazyk Mariana adalary – 14:0, Hytaý – Gündogar Timor – 2:1
«E» toparça (duşuşyklar Gyrgyzystanda geçirilýär): Özbegistan – Şri-Lanka – 4:0, Palestina – Gyrgyzystan – 1:2
«F» toparça (duşuşyklar Tailandda geçirilýär): Malaýziýa – Liwan – 0:1, Tailand – Mongoliýa – 6:0
«G» toparça (duşuşyklar Kambojada geçirilýär): Yrak – Pakistan – 8:1, Kamboja – Oman – 0:0
«H» toparça (duşuşyklar Katarda geçirilýär): Bahreýn – Hindistan – 0:2, Katar – Bruneý – 13:0
