Ýagşygeldi Kakaýew adyndaky Halkara nebit we gaz uniwersitetiniň mugallymlary we talyplary HHR-niň Ninbo şäheriniň Politehniki uniwersitetinde geçirilen «Lu Banyň ussahanasy» atly ylmy-amaly maslahata gatnaşdylar.

Maslahat Gazagystanyň, Täjigistanyň, Ermenistanyň, Belarusuň hem-de beýleki ýurtlaryň bilim ulgamynyň wekillerini we taslamanyň hyzmatdaşlaryny hem-de oňa gatnaşyjylary bir ýere jemledi. 

Maslahatyň dowamynda oňa gatnaşyjylar «Lu Banyň ussahanasy» atly halkara bilim taslamasynyň mümkinçiliklerini we geljegini bilelikde ara alyp maslahatlaşmaga mümkinçilik aldylar. Hünärmentçilik okuwynyň hytaý nusgasynyň esasynda döredilen hem-de 2016-njy ýylda köpçülikleýin ýaýrawa eýe bolan bu taslama hünär bilimi ulgamynda örän üstünlikli başlangyçlaryň biri boldy. Taslama halkara hyzmatdaşlygy pugtalandyrmaga gönükdirilen «Guşak we ýol» atly ählumumy başlangyjyň bir bölegidir. 

Häzirki günde taslama Aziýanyň, Afrikanyň we Ýewropanyň 30 ýurduny gurşap alyp, şolaryň bilim edaralarynda «Lu Banyň ussahanasynyň» 34-si döredildi. Hünär taýýarlygyna degişli bu merkezler Türkmenistanda, Täjigistanda, Gazagystanda, Russiýada, Tailandda, Efiopiýada we beýleki ýurtlarda işe girizildi. 

Türkmenistanda taslama Ýagşygeldi Kakaýew adyndaky Halkara nebit we gaz uniwersitetiniň binýadynda durmuşa geçirilýär. Häzirki wagtda uniwersitetiň çäginde «Lu Banyň ussahanasyny» işe girizmäge hem-de ony barlaghana enjamlary bilen üpjün etmäge taýýarlyk görmek boýunça işler alnyp barylýar. 

«Lu Banyň ussahanasynyň» döredilmegi bilim ulgamynda türkmen-hytaý gatnaşyklarynyň ösüşinde möhüm üstünlikleriň biridir. Taslamanyň çäklerinde taraplar amaly geologiýa we maglumat tehnologiýalary babatda okatmagyň häzirki zaman usullarynyň ornaşdyrylmagyna aýratyn üns berýärler.