Türkmenistanyň Medeniýet ministrliginiň Şekillendiriş sungatynyň sergi merkezinde suratkeş Röwşen Annanyýazowyň doglan gününiň 55 ýyllygyna bagyşlanan surat eserleriniň şahsy sergisi açyldy. Röwşen Annanyýazowyň ýakynlary onuň perişde ýaly päk, ýöne örän ejiz ýürekli bolandygyny aýdýarlar. Hut şu-da onuň wagtyndan öň aradan çykmagyna sebäp boldy.

Röwşen Annanyýazow döredijilikli maşgalada dünýä indi: ejesi, hormatly halyçy Jöwza Şahberdiýewa, edebiýat tankytçysy Hally Şahberdiýewiň gyzydy. Bu, elbetde, onuň suratçy kärini saýlamagyna täsir etmän bilmezdi. Röwşen Türkmen döwlet ýörite çeperçilik mekdebine okuwa girýär, okuwyny tamamlanyndan soň bolsa, Almaty şäherindäki sungat institutynda bilim almagyny dowam etdirýär.

R. Annanyýazowyň döredijilik işi-de gyzykly. Ol bäş ýyllap Döwlet çeperçilik akademiýasynda talyplara sungatyň dizaýn ugrundan ders berýär. Onuň birnäçe dizaýn işi sergide-de goýlupdyr. Ol alty ýyllap «Buig» türkmen-fransuz gurluşyk kompaniýasynda daşky we içki bezeg suratçysy bolup işleýär.

Suratkeşiň sergisini gyzy Çeper Durdyýewa gurady. Ol – haly we gobelen suratkeşi.

«Kakam, hakykatdanam, öz işlerini köpçülige görkezmek isleýärdi» diýip, Çeper aýdýar, «Ýöne ýetişmedi. Ýüregi tap getirmedi. Şonuň üçin onuň arzuwyny amala aşyrmak maňa borç boldy. Sergi merkeziniň ýolbaşçylaryna we şu gün kakamyň ýadygärligine hormat goýmak hem onuň işine baha bermek üçin, sergisine gelenleriň hemmesine hoşallygymy bildirýärin».

R. Annanyýazowyň işleri bolsa köpugurlylygy bilen hemmeleri haýran galdyrdy. Onuň işleriniň köpüsi abstraktsiýa uslybynda ýerine ýetirlipdir. Olaryň arasynda suratkeşiň çuňňur filosofik oýlanmalaryna şaýatlyk edýän «Allanyň barça zady görýän gözi», «Arş», «Dünýäniň döremegi» we «Ruhy dünýä» ýaly suratlar bar.

Suratlaryň käbiri simwolizm uslybynda çekilipdir – «Ylham ýoly», «Kakamyň mülki». Emma belki-de, onuň iň ýatda galyjy işi futurist uslybynda çekilen «Tebigatyň ýeňijileri» atly suratydyr. Tebigaty goramak mowzugyna köp aralaşdy, ýöne Röwşen Annanyýazowyňky ýaly şeýle täsirli we ýiti eser döretmegi başaranlar az-az boldy. Ýer ýüzünde birnäçe ynsan nesli «Biz tebigatdan sadaka garaşyp bilmeris, ony elinden almak – biziň wezipämiz» diýen şygar bilen ýaşadylar. Indi bu işiň ýalňyşdygy aýdyň görünýär. R. Annanyýazow öz işinde jansyz ýatan boz topraga haçja görnüşinde çüýlenen agaç bölegini çekipdir. Emma iň möhüm ýeri – agaçdan adama teýeneli garap duran gözdür.

«XXI asyryň örän gyzykly suratkeşi» diýip, Türkmenistanyň halk suratkeşi Gylyç Ýarmämmedow Röwşen Annanyýazow barada pikirini aýtdy.

Hakykatdanam, Röwşen Annanyýazow ynsany hem-de tebigaty duýdurmak, maslahat bermek we goramak üçin, ýurdumyzyň hem tutuş ýer ýüzüniň geljegine sereden ýalydy.

Sergide suratkeşiň realist uslypda çekilen köp sanly awtoportretleri görkezilýär. Ol biziň hakydamyzda hemişe ýaş we hoşniýetli bolup galar.