Türkmenistanyň Oguz han adyndaky Inžener-tehnologiýalar uniwersitetiniň talyplary Astanada geçirilen ýaşlaryň halkara bäsleşiklerinde üstünlikli çykyş etdiler. Bäsleşikler «Bilim-orkenieti» Milli innowasion ylmy-barlag merkezi tarapyndan «Žana Kazakhstan» Respublikan innowasion merkezi bilen bilelikde guraldy.
Uniwersitetiň magistraturasynyň talyp gyzy Aýna Ýollyýewa onlaýn görnüşde gatnaşyp, «GDA-nyň iň oňat talyby» diýen halkara bäsleşikde baş baýragy eýeledi. Bäsleşigiň eminleri ylmyň, sportuň we döredijiligiň ösdürilmegine Ýollyýewanyň goşandyna ýokary baha berdiler.
«Ekologiýa we tebigatdan peýdalanmak» taýýarlyk ugrunyň talyby Suraý Memyýewa «XXI asyryň lideri» halkara bäsleşiginde ýeňiş gazandy. Ekologiýa we ekologiýa tehnologiýalary kafedrasynyň uly mugallymy Bahadyr Ýuldaşowyň ýolbaşçylygynda Suraý hem bäsleşige onlaýn görnüşde gatnaşdy. Bäsleşigiň netijeleri boýunça eminler tarapyndan talybyň ýokary öňdebaryjylyk häsiýetleri, şeýle hem jemgyýetçilik işlerine onuň başlangyçlary hem-de işjeň gatnaşmagy bellenildi.
Türkmen ýokary okuw mekdebine wekilçilik eden talyp gyzlaryň ikisi-de I derejeli diplom, döşe dakylýan nyşan hem-de ýeňiş kubogy bilen sylaglandylar.
Astanada geçirilen halkara bäsleşikler Gazagystanyň, Russiýanyň, Belarusyň, Azerbaýjanyň, Özbegistanyň, Täjigistanyň, Türkmenistanyň we Gyrgyzystanyň talyp ýaşlaryny bir ýere jemledi.
Ýurdumyzyň tapawutlanan talyplary – Aýna Ýollyýewanyň we Suraý Memyýewanyň ylmy-taslama, ders hem-de halkara we milli derejeli beýleki bäsleşiklerde birnäçe gezek ýeňiji bolandyklaryny bellemek gerek. Uniwersitetiň ýaş, zehinli, maksada okgunly we başarnykly talyp gyzlary özleriniň ylmy, okuw hem-de döredijilik işlerini uly ymtylyş, gyzyklanma we yhlas bilen dowan edýärler.
Türkmenistanyň talyp gyzlarynyň gazanan üstünlikleri türkmen ýaşlarynyň hünär taýýarlygynyň ýokary derejesiniň, olaryň giň dünýägaraýyşlydyklarynyň, zehinlidikleriniň we döredijilik taýdan ukyplydyklarynyň, şeýle hem täze belentliklere ýetmäge hem-de Watanymyzyň dünýä giňişligindäki abraýyny has-da artdyrmaga hemişe taýýardyklarynyň nobatdaky subutnamasyna öwrüldi.
