Türkmenistanyň bilim edaralarynda 8-nji ýanwarda geçirilen ýurdumyzyň mugallymlarynyň iş maslahatlarynyň çäklerinde 2025-2026-njy okuw ýylynyň birinji ýarymynyň netijeleri jemlenildi hem-de ikinji ýarym ýyllygynyň möhüm wezipeleri kesgitlenildi.
Arkadag şäheriniň 1-nji ýöriteleşdirilen okuw-terbiýeçilik toplumynda geçirilen mejlis şäheriň häkimliginiň ýolbaşçy düzüminiň, bilim müdirliginiň, jemgyýetçilik guramalarynyň wekillerini we orta mekdepleriniň mugallymlarynyň 165-sini bir ýere jemledi.
Arkadag şäheriniň häkiminiň orunbasary Altyn Tejenowa, Arkadag şäheriniň bilim müdirliginiň başlygy Ýanwar Annaýew, Türkmenistanyň Magtymguly adyndaky Ýaşlar guramasynyň Arkadag şäher Geňeşiniň başlygy Mekan Amanlyýew hem-de Türkmenistanyň Demokratik partiýasynyň şäher komitetiniň başlygy Araphan Ernyýazow mejlise gatnaşyjylara giriş sözleri bilen ýüzlendiler.
Çykyşlarda milli bilim ulgamyny ösdürmäge we yzygiderli kämilleşdirmäge, ony dünýä derejelerine çykarmaga gönükdirilip, bilim ulgamynda alnyp barylýan giň gerimli özgertmeleriň çäklerinde gazanylýan üstünlikler buýsanç bilen bellenildi.
Mekdebe çenli edaralarda we orta okuw mekdeplerde bilim alýan çagalary hemmetaraplaýyn terbiýelemek we taýýarlamak boýunça öňde durýan ilkinji nobatdaky wezipeler hem-de meýilnamalar barada aýdyldy. Sazlaşykly ösen ýaş nesilleri kemala getirmäge, olaryň döredijilik we intellektual ukyplaryny açmaga, çagalaryň ylyma we bilime höwesini artdyrmaga gönükdirilen işleriň ähmiýeti nygtaldy. Okuwçylaryň okuw maksatnamasyny doly özleşdirmekleriniň üpjün edilmelidigi göz öňünde tutulyp, bilim bermek işine okatmagyň iň täze usullaryny mundan beýläk-de ornaşdyrmagyň zerurdygy bellenildi.
Çäräniň dowamynda çagalar baglarynyň we orta mekdepleriň ýolbaşçylary, mugallymlary, usulyýetçileri, terbiýeçileri halypaçylyk, hünär we mugallymçylyk ukyp-başarnyklaryny ýokarlandyrmak, okatmagyň innowasion usullary, döwrebap okuw-terbiýeçilik işleri diýen temalar boýunça mazmunly çykyş etdiler.
Aşgabat şäheriniň daşary ýurt dilleri çuňlaşdyrylyp öwredilýän 29-njy we 131-nji ýöriteleşdirilen orta mekdeplerinde bilim işgärleriniň iş maslahaty işjeň ýagdaýda geçdi.
Bu duşuşyk hem birinji ýarym ýyllygyň netijelerine hem-de okuw ýylynyň öňdäki ýarym ýyllygyndaky wezipelerine bagyşlandy. Şol wezipeler bilimiň ýokary hilini üpjün etmek we ýaş nesilleri terbiýelemek, okuw meýilnamalaryny we kitaplaryny täzelemek, bilim işgärleriniň hünär derejelerini hem-de okuw işleriniň netijeliligini ýokarlandyrmak maksady bilen öňde goýuldy.
Çykyşlarda synplarda okatmagyň innowasion tehnologiýalaryny we sanly serişdeleri ulanmagyň, olaryň kömegi bilen bilim berilişiniň mazmunyny baýlaşdyrmagyň usullaryna, şeýle hem okuw dersleri çuňlaşdyrylyp öwredilýän ýöriteleşdirilen mekdepleriň hem-de mekdebe çenli edaralaryň işlerini döwrebaplaşdyrmaga bolan çemeleşmelere garaldy. Mekdebe çenli bilimiň başlangyç bilim bilen aýrylmaz arabaglanyşygynyň üpjün edilmelidigi, okuwçylary sapaklara höweslendirmelidigi, öňdebaryjy tejribeleri öwrenip ýaýratmalydygy barada aýdyldy.
Paýtagtymyzyň mekdepleriniň öňdebaryjy mugallymlary tematiki çykyşlary bilen tanyşdyrdylar, şol çykyşlar mejlise gatnaşyjylarda hakyky gyzyklanma döredip, çäre örän işjeň ýagdaýda dowam etdi.
Şeýle iş maslahat Mary welaýatynyň mekdebe çenli edaralarynyň terbiýeçilerini hem-de orta mekdepleriniň mugallymlaryny-da bir ýere jemledi. Çäre welaýatyň at gazanan mugallymlarynyň, hormatly ýaşulularynyň, Türkmenistanyň Mejlisiniň deputatlarynyň, jemgyýetçilik guramalaryň, Türkmenistanyň Senagatçylar we telekeçiler birleşmesiniň wekilleriniň hem-de beýleki myhmanlaryň gatnaşmagynda geçirildi.
Bu duşuşygyň çäklerinde bilim edaralarynyň ýolbaşçylarynyň, mugallymlaryň we terbiýeçileriň, bilim ulgamynyň esasy hünärmenleriniň mazmunly çykyşlary diňlenildi. Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasy babatda geljegi uly wezipelere üns çekildi. Şunuň bilen baglylykda, mugallymçylyk ussatlygyny hemişe kämilleşdirmegiň, daşary ýurtlaryň we milli tejribeleriň iň oňatlaryny öwrenmegiň hem-de ýaýratmagyň, okatmagyň häzirki zamandaky ýokary netijeli usullaryny ornaşdyrmagyň, dersleriň arabaglanyşygyny üpjün etmegiň, okuwçylaryň anyk iş başarnyklaryny ösdürmegiň wajypdygy nygtaldy.
Bilim işgärleriniň däp bolan ýanwar iş maslahatlary ýurduň ähli welaýatlarynyň etraplarynda we şäherlerinde guramaçylykly hem-de netijeli geçdi. Olaryň her ýyl geçirilmegi, esasan, sazlaşykly ösen, zehinli ýaşlary terbiýelemek, okuwçylaryň döredijilik ukyplaryny ösdürmek we höweslendirmek, mugallymlaryň hünär derejelerini ýokarlandyrmak, öňdebaryjy tejribeleri we innowasion usullary ulanmak arkaly okuw işini kämilleşdirmek, ösüp gelýän nesilleri halkara ölçeglerine laýyklykda ýokary hilli bilim bilen üpjün etmek boýunça möhüm wezipeleri ýerine ýetirmäge gönükdirilendir.
