Türkmenistanyň mekdep okuwçylary Gazagystan Respublikasynyň Astana şäherinde 10 – 15-nji ýanwar aralygynda matematika, fizika we informatika dersleri boýunça geçirilen XXII Halkara Žautykow olimpiadasynda uly üstünliklere eýe boldular.
Bu abraýly intellektual bäsleşigiň jemleri boýunça Türkmenistanyň orta mekdepleriniň okuwçylary jemi 16 medala – 1 altyn, 4 kümüş we 11 bürünç medala mynasyp boldular.
Matematika dersi boýunça Aşgabat şäherindäki 86-njy orta mekdebiň 10-njy synp okuwçysy Hemra Gurbanow altyn medala eýe boldy.
Şol ders boýunça kümüş medallara paýtagtymyzyň mekdepleriniň okuwçylary Mälikşa Meýlismyradow (86-njy mekdep), Myrat Ruslanow (97-nji mekdep) we Selim Hommatdurdyýew (135-nji mekdep) mynasyp boldular. Bürünç medallary bolsa Seýitgeldi Hojamuhammedow (83-nji mekdep), Sanjar Hojanyýazow we Söýünmuhammet Geldimämmedow (49-njy mekdep), Begli Işanmyradow we Kümüş Nobatowa (86-njy mekdep), şeýle hem Daşoguz şäherindäki 26-njy mekdebiň okuwçysy Begenç Gummanow gazandylar.
Fizika dersi boýunça Mary welaýatynyň Şatlyk şäherinden Döwlet Annamyradow kümüş medala, Nurgeldi Annagurdow (79-njy mekdep) we Aýsenem Kakamyradowa (Mary şäherindäki 10-njy orta mekdep) bürünç medallara mynasyp boldular.
Informatika dersi boýunça Aşgabatly okuwçylar Hojamuhammet Hydyrow, Yhlas Annamyradow (86-njy mekdep) hem-de Kasym Köçekow (135-nji mekdep) bürünç medallara mynasyp boldular.
Gazagystan Respublikasynyň Magaryf ministrliginiň «Daryn» ylmy-amaly merkezi tarapyndan guralan bu olimpiada 2005-nji ýyldan bäri her ýyl geçirilip gelinýär. Ol däp boýunça okuwçylaryň arasynda fizika-matematika ylymlarynyň wagyz edilmegine, halkara hyzmatdaşlygyň berkidilmegine we bilim edaralarynyň arasynda tejribe alyşmaga ýardam edýär.
Bu ýylky olimpiada dünýäniň 16 ýurdundan, şol sanda Gazagystandan, Türkmenistandan, Gyrgyzystandan, Özbegistandan, Täjigistandan, Russiýadan, Belarusdan, Ermenistandan, Azerbaýjandan, Türkiýeden we beýleki döwletlerden 610-dan gowrak zehinli mekdep okuwçysy gatnaşdy.
28 okuwçydan ybarat bolan Türkmenistanyň topary bäsleşigiň ähli ugurlary boýunça özleriniň çuňňur bilimlerini, döredijilik ukyplaryny we ýokary taýýarlyk derejesini görkezip, ýurdumyza mynasyp wekilçilik etdiler.
Türkmen mekdep okuwçylarynyň olimpiadada gazanan ajaýyp netijeleri täze, 2026-njy ýylda türkmen ýaşlarynyň halkara derejesindäki ilkinji uly üstünligi boldy. Bu bolsa ýurdumyzyň zehinli ýaş nesilleriniň täze sepgitleri eýelemäge, Watanymyzyň dünýä giňişligindäki abraýyny has-da belende götermäge bolan yzygiderli ymtylmalaryny we taýýarlygyny ýene-de bir gezek tassyklady.
