Magtymguly adyndaky milli sazly drama teatrynda Türkmenistanyň at gazanan artisti Resul Gylyjowyň ýolbaşçylygyndaky Döwlet simfoniki orkestriniň «Simfoniki suratlar» atly konserti uly üstünlik gazandy.

Saz muşdaklary Rimskiý-Korsakowyň «Şa-soltan hakynda erteki» operasyndan «Üç gudrat» atly ilkinji çykyşdan başlap jadyly bir dünýä düşdi. Simfoniýada Aleksandr Puşkiniň eserini bezän halk heňleri, tolkunlaryň pagşyldysy we gudratlar eşidilýärdi.

Konsertde Rimskiý-Korsakowyň «Müň bir gije» ertekileriniň täsiri astynda ýazan «Şährizada» simfoniki sýuitasy hem ýaňlandy. Orkestriň esasy skripkaçysy Selbinyýaz Mülkamanowa onuň sazyny iň ýokary notada ýekelikde ýerine ýetirdi. Soňra bolsa mukamlaryň we duýgularyň keýpleriň gaýtalap bolmajak owadan gapma-garşylygyny döredip, orkestr «gümmürdedi».

Anatoliý Lýadowyň «Baba-Ýaga» simfoniki keşbi konserte birneme şadyýanlyk getirdi. Lýadow saz arkaly towuk aýakly kepbäni we onuň eýesini diýseň obrazly suratlandyrdy.

Modest Mussorgskiý suratkeş dosty Wiktor Gartmanyň hatyrasyna «Sergidäki suratlar» diýen umumy at bilen birnäçe fortepiano eserini ýazdy. Eserde suratkeşiň sergide görkezen harizmatik portretleri, liriki peýzažlary, halk seýli we bazarlary beýan edilýär.

Tomaşaçylar ähli eserleri ussatlyk bilen ýerine ýetirendikleri üçin, sazandalary şowhunly el çarpyşmalar bilen alkyşladylar. Soňra orkestr «Sergidäki suratlar» eserinden gopak tans sazyny çaldy.

Tomaşaçylaryň el çarpyşmalary astynda Russiýa Federasiýasynyň Türkmenistandaky Adatdan daşary we Doly ygtyýarly ilçisi Iwan Wolynkin sahna çykdy. Ol Resul Gylyjowy üstünlikli konsert bilen gutlap, oňa gül dessesini gowşurdy.