GDA agza ýurtlaryň «Bedew bady: güýç hem gözellik» atly döwletara telewizion bäsleşiginiň başlanmagy baradaky yglannama maglumat we kino jemgyýetçiliginde giň gyzyklanma döretdi. Guramaçylaryň sözlerine görä, eýýäm Arkalaşygyň birnäçe ýurdunyň wekilleri habarlaşyp, özleriniň çärä gatnaşjakdyklaryny tassykladylar.
Ozal habar berlişi ýaly, bäsleşige resminamalaýyn, resminamalaýyn-köpçülikleýin filmleri we oçerkleri-de goşmak bilen, dürli formatdaky telewideniýe we ekran filmleri gatnaşyp biler. Bäsleşige gatnaşýan işleriň dowamlylygy titrler bilen birlikde, 15 – 30 minut aralygynda bolmaly, öndürilen ýyly bolsa 2024-nji ýyldan ir bolmaly däl.
Eminler düzümine GDA agza her ýurtdan telewideniýe we kino senagatynyň wekilleri, atçylyk sporty boýunça hünärmenler we medeni guramalaryň bilermenleri girer.
«Garaşsyz, baky Bitarap Türkmenistan – bedew batly at-myradyň mekany» şygary astynda geçýän ýylda yglan edilen bu bäsleşik özboluşly üýtgeşikdir. Ahalteke atçylyk sungatynyň we atlary bezemek däpleriniň ÝUNESKO-nyň Adamzadyň maddy däl medeni mirasynyň sanawyna girizilen bu behişdi bedewler barada ýyllaryň dowamynda köp sanly çeper we resminamalaýyn filmler döredildi.
Bedewe bagyşlanan häzirki zaman işleriň arasynda Oguz han adyndaky «Türkmenfilm» birleşiginiň «At – myrat» filmi tapawutlanýar. Filmde on iki ýaşly Merdan barada gürrüň berilýär, ol seýis atasynyň ýolbaşçylygynda at seýislemegiň esaslaryny öwrenýär we bu behişdi bedewler bilen gatnaşyk arkaly asyllylygyň, özüňi gaýgyrmazlygyň we batyrlygyň gymmatlyklaryny açýar.
Gahrymanyň döredijilikli hyýaly tomaşaçylary Oguz han döwrüne alyp barýar we geçmişdäki çapyksuwarlary görkezýär, filmiň düzümindäki resminama esasynda alnan parçalar bolsa türkmeniň ahalteke atynyň tohumyny saklamakda we türkmen atçylyk sportunyň dünýä derejesinde ösüşindäki häzirki zaman üstünlikleri aýdyň görkezýär.
Daşary ýurt kinostudiýalary hem meşhur ahalteke atlaryna gyzyklanma bildirýärler. Mysal üçin, «Amazing Pictures» amerikan kompaniýasy meşhur tohumyň taryhyna we häzirki ýagdaýyna bagyşlanan resminamalaýyn film döretdi. Surata düşüriş topary Türkmenistana saparynyň dowamynda Halkara ahalteke atçylyk assosiasiýasynyň maslahatlaryna we mejlislerine gatnaşdy. Ýewropanyň esasy telekanallary üçin atçylyk mowzugynda ýöriteleşen «Peignoir Prod» fransuz kinostudiýasy hem Türkmenistana wekiliýet iberdi.
2023-nji ýylda «RT Documentary» ýaýlymynyň wekilleri türkmen çapyksuwarlary bilen söhbetdeşlikler arkaly özboluşly materiallary toplap, täsirli «Ahalteke atlary: behişdi jandarlar» filmini döretdi.
2026-njy ýylyň 1-nji ýanwarynda Türkmenistan GDA-nyň başlyklygyny öz üstüne aldy. Onuň işleriniň biri Arkalaşygyň halklarynyň arasyndaky medeni, taryhy we sport gatnaşyklaryny berkitmek bolar. Atçylykda hyzmatdaşlyk bu tagallalarda möhüm orun eýeleýär. Şu nukdaýnazardan, Türkmenistan tarapyndan yglan edilen «Bedew bady: güýç hem gözellik» bäsleşigi diňe bir döredijilik bäsleşigi däl, eýsem medeni alyş-çalyş üçin möhüm ýerlige öwrülýär.
Bäsleşik Arkalaşygyň ýurtlaryndan kinoçylary janly miras mowzugynyň töwereginde birleşdirmegi maksat edinýär, olara ahalteke tohumynyň asyllylygyny we onuň asyrlardan bäri dowam edýän däp-dessurlaryny suratda beýan etmäge mümkinçilik berýär.
