Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow «Al-Arabiýa» teleýaýlymy bilen bolan söhbetdeşlikde bilim pudagyndaky özgertmeleriň we häzirki zaman türkmen ýaşlarynyň durmuşynda iňlis diliniň aýratyn orny barada jikme-jik durup geçdi.

Gahryman Arkadagymyz iňlis dilini öwrenmegiň häzirki wagtda milli bilim ulgamynyň hökmany elementidigini belledi. Şeýlelikde, ýurdumyzyň ähli umumy bilim berýän mekdeplerinde iňlis dili öwredilýär, ýurdumyzyň esasy dört ýokary okuw mekdebinde bolsa okuwlar doly iňlis dilinde alnyp barylýar.

Söhbetdeşligiň barşynda aýratyn üns innowasiýa bilim merkezine öwrülýän täze Arkadag şäherine berildi.

Ýurdumyzda gurlan Arkadag şäherinde häzirki zaman bilim usullary we standartlary boýunça okadyljak, iňlis diline ýöriteleşdirilen mekdebi açmagy meýilleşdirýäris. Şunda esasy ünsi çekmeli zat bar: okuw prosesi ýaşlara ABŞ-nyň abraýly uniwersitetlerinde, ýagny Garwardda, Massaçusets tehnologiýa institutynda, Kolumbiýa uniwersitetinde okuwlaryny dowam etdirmäge mümkinçilik bermäge gönükdiriler. Ine, şu ýerde Türkmenistanyň we ABŞ-nyň bilim hem-de ylmy jemgyýetçiliginiň häzirki işi üçin giň mümkinçilikler açylýar» diýip, türkmen halkynyň Milli Lideri aýtdy.

Gahryman Arkadagymyz bu çemeleşmäniň Türkmenistanyň we ABŞ-nyň ylmy hem bilim jemgyýetleriniň arasyndaky hyzmatdaşlyk üçin öň görlüp-eşidilmedik mümkinçilikleri açýandygy bilen sözüni jemledi.