Mukaddes Garaşsyzlygymyzyň şöhratly 35 ýyllyk taryhy senesiniň uludan toýlanyljak «Garaşsyz, baky Bitarap Türkmenistan – bedew batly at-myradyň mekany» ýyly kalplarymyza unudylmajak röwşenlik nuruny çaýyp, hakydalara hemişelik ýazylýar. Şanly ýylymyzyň her bir güni ýatdan çykmajak ajaýyp dabaralara, täsirli baýramçylyk çärelerine ulaşýar.
Şu günler giň gerimde ýaýbaňlandyrylan Halkara zenanlar gününiň dabaralary Balkan welaýatynyň çar künjeginde belentden tutulýar. Welaýatyň ähli etraplarydyr şäherlerini gurşap alan toý-baýramçylyk çärelerinde Berkarar döwletiň täze eýýamynyň Galkynyşy döwrüniň taýsyz eşretleriniň, ýurt abadançylygynyň, halkymyzyň bagtyýarlygynyň hem-de Halkara zenanlar baýramynyň mynasyp waspy aýdyň beýanyny tapýar.
Uly şatlyk-şowhuna, egsilmez ruhy joşguna, aýratyn ähmiýete beslenýän şeýle dabaralaryň biri welaýat merkezi Balkanabat şäherindäki «Türkmeniň ak öýi» binasynda geçirildi. Balkan welaýat häkimliginiň, welaýat medeniýet müdirliginiň hem-de Türkmenistanyň Zenanlar birleşiginiň welaýat bölüminiň, beýleki jemgyýetçilik guramalarynyň bilelikde guran bu aýdym-sazly dabarasy «Bedew batly Watanymyzyň bagtyýar zenanlary!» diýlip atlandyryldy. Halkara zenanlar gününiň şanyna bagyşlanyp, welaýat derejesinde guralan baýramçylyk dabarasyna Günbatar sebitiň etraplarydyr şäherlerinden gelin-gyzlar, mährem eneler, jemgyýetçilik guramalarynyň wekilleri, önümçiligiň öňdebaryjylarydyr talyp ýaşlar işjeň gatnaşdylar.
Çäksiz söýgä, bimöçber buýsanja beslenen dabarada türkmen halkynyň Milli Lideri Gahryman Arkadagymyzyň we hormatly Prezidentimiz Arkadagly Gahryman Serdarymyzyň ýadawsyz tagallalary netijesinde «Garaşsyz, baky Bitarap Türkmenistan – bedew batly at-myradyň mekany» ýylynda ýetilýän belent sepgitler, gazanylýan nusgalyk üstünlikler, bagtyýar zenanlara, gelin-gyzlara döwlet derejesinde goýulýan hormatdyr sylag-sarpa dogrusynda guwançly bellenip geçildi. Şeýle-de taryhy eýýamymyzyň beýik ösüşlerinden, şonuň ýaly-da özleri baradaky, halkymyz hakyndaky aladalardan ruhlanan mähriban zenanlar Gahryman Arkadagymyza hem-de Arkadagly Gahryman Serdarymyza egsilmez alkyş, hoşallyk sözlerini beýan etdiler.
Welaýatyň çar künjeginden gelen medeniýet we sungat işgärleriniň, sahna ussatlarynyň, talyp ýaşlaryň uly joşgunda ýerine ýetiren aýdym-sazlary-da «Türkmeniň ak öýi» binasynyň üç müň orunlyk zalyny dolduryp oturan tomaşaçylaryň şatlyk-şowhunyny arşa göterdi. Buýsançly çykyşlarda hormatly döwlet Baştutanymyzyň paýhasyndan nurlanan toýly ülkämiziň, läle-reýhana beslenen ýakymly ýazyň, baharyň ilkinji günlerinde bellenilýän Halkara zenanlar gününiň, ajaýyp baýramyň görki, ýaraşygy hasaplanýan gelin-gyzlaryň, eneleriň, dost-doganlygyň, parahatçylygyň tarypy ýetirildi.
Berkarar Watanymyzyň şöhratly taryhynda sahawata ýugrulan mukaddes däp-dessurlarymyzdan gözbaş alýan folklor we tans toparlarynyň kalplary heýjana getiren şowhunly çykyşlary täze taryhy döwrümiziň bagtyýar keşbini döwrebap derejede aýdyň şöhlelendirdi. Şeýle-de Günbatar sebitiň birleşen döredijilik toparlarynyň baý mazmundaky edebi-sazly çykyşlary dabara gatnaşyjylar tarapyndan dowamly el çarpyşmalar bilen alkyşlanyldy.
