Türkmenistanyň ýokary okuw mekdepleri M.W.Lomonosow adyndaky Moskwa döwlet uniwersiteti tarapyndan guralýan «Lomonosow-2026» halkara Ýaşlar ylmy forumyna gatnaşarlar.

Forumyň çäginde 10 – 25-nji aprel aralygynda talyplaryň, aspirantlaryň we ýaş alymlaryň gatnaşmagynda XXXIII halkara «Lomonosow» atly ylmy maslahat geçiriler. Bu giň möçberli ylmy maslahat Russiýa Federasiýasynyň sebitleýin ýerlerinde, şeýle hem Russiýa Federasiýasynyň M.W.Lomonosow adyndaky Moskwa döwlet uniwersitetiniň Gazagystandaky, Täjigistandaky, Ermenistandaky, Özbegistandaky, Azerbaýjandaky we Hytaýdaky şahamçalarynda, şeýle hem Türkmenistandaky halkara meýdançasynda geçiriler.

Maslahatyň halkara meýdançasy Aşgabat şäherinde Döwletmämmet Azady adyndaky Türkmen milli dünýä dilleri institutynyň we Magtymguly adyndaky Türkmen döwlet uniwersitetiniň binýadynda guralar.

Halkara hyzmatdaşlygynyň bu görnüşi ilkinji gezek geçen ýyl biziň ýurdumyzda geçirildi. Şonda Döwletmämmet Azady adyndaky Türkmen milli dünýä dilleri institutynyň binýadynda «Lomonosow» halkara maslahatynyň iki bölümçesi geçirildi.

Şu ýyl Aşgabatda geçiriljek halkara meýdança giňeldildi: işler iki ýokary okuw mekdebiň arasynda dört ylmy ugur boýunça bölündi, bu bolsa türkmen uniwersitetleri bilen Russiýanyň uniwersitetiniň arasyndaky akademiki hyzmatdaşlygyň we däp bolan dostlukly gatnaşyklaryň has-da pugtalandyrylandygyny görkezýär.

Geljekki forumyň çäklerinde Döwletmämmet Azady adyndaky Türkmen milli dünýä dilleri instituty «Daşary ýurt dilleri we sebitleýin öwreniş», «Terjimäniň nazaryýeti, taryhy we metodologiýasy» hem-de «Filologiýa» ugurlary boýunça jogapkär gurama hökmünde çykyş eder. Magtymguly adyndaky Türkmen döwlet uniwersiteti bolsa himiýa ugruna gözegçilik eder.

Maslahata 35 ýaşa çenli talyplar, magistrantlar, aspirantlar we ýaş alymlar gatnaşyp bilerler. Hasaba alyş «Lomonosow» ylmy-bilim portalynyň üsti bilen 6-njy aprele çenli dowam eder. Maslahatyň iş dilleri rus we iňlis dilleridir. Gatnaşmak tölegsizdir. Forumyň netijeleri boýunça gatnaşyjylara şahadatnamalar gowşurylar, iň gowy ylmy işleriň awtorlary bolsa diplomlar bilen sylaglanar.

Umuman, şu ýylky maslahat Russiýanyň we ýokarda agzalan ýurtlaryň ýerlerinde geçirilýär we häzirki zaman düýpli we amaly ylmynyň esasy ugurlaryny öz içine alýan 44 bölümden ybarat bolar.

«Lomonosow» maslahatynyň esasy maksady talyplaryň, aspirantlaryň we ýaş alymlaryň döredijilik işjeňligini ösdürmek, olary häzirki zaman ylmynyň möhüm meselelerini çözmäge çekmek, bitewi halkara ylym-bilim giňişligini saklamak we ösdürmek, şeýle hem geljekki kärdeşleriň arasynda aragatnaşyk gurmakdan ybaratdyr.