Türkmenistanyň 14 ýaşly tennisçisi, ýaryşdaky ilkinji çykyşyny geçirýän Ali Geldiýew Almatynyň «Gorky Tennis Park» tennis toplumynyň meýdançalarynda geçirilýän «Roland-Garros Junior Series» sebitleýin saýlama ýaryşynda iň güýçli sekiz türgeniň hataryna girdi. Bu üstünlik milli tennis sportumyzyň taryhynda ýene bir ajaýyp waka boldy.
Ýaryşa Merkezi we Günbatar Aziýanyň 16 ýaşa çenli iň güýçli 16 ýetginjek türgeni we 16 ýetginjek gyzy gatnaşýar. Pariždäki ýaryşa gatnaşmak hukugy ugrundaky bäsleşikde Eýranyň, Iordaniýanyň, Gazagystanyň, Gyrgyzystanyň, Saud Arabystanynyň, Siriýanyň, Türkmenistanyň we Özbegistanyň wekilleri çykyş edýärler.
Saýlama tapgyrynyň ýeňijileri oktýabr aýynda Ýaponiýada geçiriljek «Roland-Garros Junior Series» ýaryşynyň jemleýji tapgyryna gatnaşarlar. Hut şol ýerde 2027-nji ýylyň ýetginjekleriň arasyndaky «Roland-Garros» ýaryşynyň esasy sanawyna ýeke-täk ýollanma ugrunda oýnalar.
Almatyda çykyş etmek hukugyny 10-njy synpda okaýan, Ýaş olimpiýaçylary taýýarlaýyş mekdebiniň okuwçysy Ali Geldiýew ýokary halkara we Aziýa reýtingindäki görkezijileri netijesinde gazandy. Bije çekişligiň netijesine görä, Ali «A» toparçasyna düşdi we Gazagystandan hem-de Özbegistandan gelen garşydaşlary bilen güýç synanyşdy.
Türkmenistanyň tennisçisi toparçadaky duşuşyklary ynamly geçirip, hakyky häsiýetini görkezdi. Ilkinji duşuşykda ýaryşyň birinji belgili türgeni, Gazagystanyň wekili Rodion Traýgel bilen bolan oýunda Ali ilkinji setde 3:6 hasabynda ýeňildi, emma ikinji setde 6:2 hasabynda ýeňiş gazanyp, hasaby deňledi. Karar beriji tapgyryň öňüsyrasynda A.Geldiýewiň aýagynyň damary çekdi, muňa garamazdan, ol göreşi dowam etdirdi we diňe taý-breýkde 5:10 hasabynda ýeňildi.
Ikinji duşuşykda A.Geldiýew ýedinji belgili Özbegistanyň wekili Beksulton Woksidowy 7:6 (1), 6:0 hasabynda ýeňdi. Soňky toparlaýyn duşuşykda bolsa ýene bir özbek tennisçisi Don Son Kime hiç hili mümkinçilik bermän, ony 6:0, 6:1 hasabynda ýeňdi.
Toparda ikinji orny eýelän Ali çärýek finala çykdy. Bu tapgyrda onuň garşydaşy «D» toparçasynyň ýeňijisi, ýaryşyň sekizinji belgili türgeni, Eýranyň wekili Kiaraş Sadegizeýdi bolar.
Halkara derejesindäki şeýle abraýly ýaryşyň utulan-çykdy tapgyryna çykmak ýaş türgeniň sport ýolundaky möhüm ädimdir. Şu ýylyň maý aýynda hem Ali Geldiýew 14 ýaşynda ilkinji gezek Türkmenistanyň erkekleriň arasynda çempiony bolup, milli rekord goýdy.
Ali uly tennisdäki ýoluny Türkmenabat şäherindäki 9-njy sport mekdebinde Babamyrat Mamatrasulowyň ýolbaşçylygynda başlady. Häzirki wagtda geljegi uly türgen ussatlygyny Aşgabatda Meýlis Orazmuhammedowyň we Ýuriý Rogusskiniň ýolbaşçylygynda kämilleşdirýär.
