«SOCAR» kompaniýasy 2026-njy ýylyň 21–23-nji oktýabrynda Aşgabatda geçiriljek «Türkmenistanyň nebiti we gazy —2026» atly XXXI halkara maslahatynyň we sergisiniň ýene-de Baş hyzmatdaşy hökmünde çykyş eder.

Bu hyzmatdaşlyk «SOCAR»-yň halkara energetika giňişligindäki ornunyň barha pugtalandyrylýandygyny, şeýle hem Azerbaýjan bilen Türkmenistanyň arasynda energetika ulgamyndaky hyzmatdaşlygyň strategik ähmiýetiniň ýokarlanýandygyny görkezýär.

Türkmenistanyň energetika pudagyndaky esasy halkara forumy bolan «OGT 2026» milli we daşary ýurt energetika kompaniýalaryny, maýadarlary, maliýe edaralaryny, tehnologiýa üpjün edijilerini hem-de dünýä energetika ulgamynyň dürli ugurlaryna wekilçilik edýän ýokary derejeli ýolbaşçylary bir ýere jemlär.

«SOCAR»-yň «OGT 2026»-a gatnaşmagy kompaniýanyň ösüşiniň möhüm döwrüne gabat gelýär. Häzirki wagtda kompaniýa nebitgaz gözlegleri we çykarylyşy, gaýtadan işlemek, söwda, gaz üpjünçiligi we halkara maýa goýumlary boýunça işini giňeltmek bilen bir hatarda, energetika howpsuzlygyna, innowasiýalara, sanlylaşdyrmaga hem-de energetika gönükdirilen uzak möhletleýin strategiýasyny durmuşa geçirýär.

2035-nji ýyla çenli Korporatiw strategiýasynyň çäklerinde «SOCAR» halkara işini mundan beýläk-de giňeltmegi, önümçilik netijeliligini we tehnologik mümkinçiliklerini ýokarlandyrmagy, şeýle hem pes uglerodly ösüşi ilerletmegi maksat edinýär.

2025-nji ýylda Aşgabatda geçirilen «OGT» maslahatynda «SOCAR»-yň prezidenti Röwşen Najaf Azerbaýjan bilen Türkmenistanyň arasyndaky hyzmatdaşlygyň Hazar sebitiniň energetika geljegini kemala getirmekdäki ähmiýetiniň barha artýandygyny belläp:

- Biziň bilelikdäki hyzmatdaşlygymyz Hazar sebitiniň durnukly energetikanyň strategik merkezine öwrülmegine ýardam berýär- diýip nygtady.

Bu pikir iki ýurduň arasyndaky hyzmatdaşlygyň energetika, ulag, söwda, özara baglanyşyk we durnukly ösüş ugurlarynyň barha giňeldilýän häzirki döwründe aýratyn ähmiýete eýedir.

Häzirki wagtda «SOCAR» nebitgaz gözlegleri we çykarylyşy, daşamak, nebiti gaýtadan işlemek, nebithimiýa, söwda, marketing we energetika infrastrukturasyny öz içine alýan giň gerimli ugurlarda iş alyp barýar. Şol bir wagtyň özünde kompaniýa dünýä energetika geçişi bilen baglanyşykly täze ugurlary hem ösdürýär.

Soňky ýyllarda kompaniýa halkara portfeliniň geografik taýdan diwersifikasiýalaşdyrylmagyny has-da çaltlandyrdy.

«SOCAR»-yň soňky döwürde amala aşyran möhüm ädimleriniň biri Italiýadaky işiniň giňeldilmegi, şol sanda «Italiana Petroli» kompaniýasynyň paýlarynyň 99,82 göteriminiň satyn alynmagy boldy. Bu «SOCAR»-yň Ýewropanyň iri energetika bazarlarynyň birindäki ornuny has-da pugtalandyrdy.

90 ýyldan gowrak taryhy bolan «Italiana Petroli» Italiýanyň ulag we energetika üpjünçiliginde möhüm orun eýeleýär. Kompaniýanyň toplumlaýyn iş ulgamy nebiti gaýtadan işleýän iki zawody, saklaýyş desgalaryny, logistika infrastrukturasyny hem-de ýurduň çäginde giň ýaýran bölek satuw ulgamyny öz içine alýar. Onuň «SOCAR»-yň halkara portfeline goşulmagy kompaniýanyň Ýewropanyň energetika bazaryndaky ornuny has-da giňeldýär.

«SOCAR» nebitgaz gözlegleri we çykarylyşy boýunça halkara portfelini hem giňeltmegini dowam etdirýär. 2025-nji ýylyň ýanwar aýynda kompaniýa Ysraýylyň deňiz böleginde ýerleşýän «Tamar» gaz känindäki 10 göterim netijeli paýy satyn almak barada ylalaşyga gol çekdi. 2026-njy ýylyň ýanwar aýynda bolsa «SOCAR» bilen Eni Kot-d’Iwuaryň deňiz bölegindäki «Baleine» taslamasynda 10 göterim paýyň «SOCAR» tarapyndan satyn alynmagyny göz öňünde tutýan ylalaşyga gol çekdiler. Bu maýa goýumlary «SOCAR»-yň Hazardaky berk serişde binýadyny Ýewropada, Ýakyn Gündogarda, Merkezi Aziýada we Afrikada ýerleşýän halkara nebitgaz, gaýtadan işleýiş we söwda aktiwleri bilen utgaşdyrmaga gönükdirilen giň gerimli strategiýasyny görkezýär.

«SOCAR»-yň Özbegistandaky işjeňliginiň giňeldilmegi Merkezi Aziýanyň energetika pudagynyň ösüşi nukdaýnazaryndan aýratyn ähmiýete eýedir. 2025-nji ýylyň iýul aýynda SOCAR, «Uzbekneftegaz» we Özbegistan Respublikasynyň Energetika ministrligi Üstýurt sebitinde uglewodorod serişdelerini gözlemek we geljekde çykarmak boýunça Önümi paýlaşmak hakynda ylalaşyga gol çekdiler.

Taslama üç ölçegli seýsmiki barlaglary hem-de soňraky gözleg buraw işlerini öz içine alýan giň gerimli geologiýa-gözleg maksatnamasynyň durmuşa geçirilmegini göz öňünde tutýar. 2026-njy ýylyň maý aýynda «BP» britan energetika kompaniýasynyň Demirgazyk Üstýurt boýunça Önümi paýlaşmak hakynda ylalaşyga 40 göterim paý bilen goşulmagy taslamanyň ösüşinde nobatdaky möhüm tapgyr boldy. Şondan soň taslamadaky paýlar «BP» — 40 göterim, «Uzbekneftegaz» — 30 göterim we «SOCAR» — 30 göterim görnüşinde paýlandy. «SOCAR» bolsa gözleg taslamasynyň operatory bolmagynda galdy. Bu taslama «SOCAR»-yň sebitde täze iş ugurlaryny döretmek, şol bir wagtyň özünde iri halkara energetika kompaniýalaryny bilelikdäki maýa goýum taslamalarynyň çäklerinde birleşdirmek mümkinçiliklerini görkezýär.

Günorta gaz geçelgesi häzirki wagtda Ýewropanyň energetika ulgamynyň möhüm bölekleriniň biridir. Ol Ýewropa Bileleşigi üçin dördünji gaz üpjünçilik ugruny açyp, energiýa çeşmeleriniň we üpjünçilik ugurlarynyň diwersifikasiýalaşdyrylmagyna mümkinçilik berdi. 2020-nji ýylyň ahyrynda Transadriatik gaz geçirijisiniň işe girizilmegi Azerbaýjanyň tebigy gazyny Ýewropa bazarlaryna göni ibermäge mümkinçilik döretdi. 2022-nji ýylda Azerbaýjan bilen Ýewropa Bileleşiginiň arasynda energetika ulgamynda strategik hyzmatdaşlyk boýunça Özara düşünişmek hakynda Ähtnama gol çekilmegi bolsa hyzmatdaşlygyň täze tapgyryna badalga berdi.

Häzirki wagtda Azerbaýjanyň tebigy gazy 16 ýurda, şol sanda Ýewropa Bileleşiginiň 10 döwletine iberilýär. 2025-nji ýylda Ýewropanyň sarp edijilerine 13 milliard kub metre golaý tebigy gaz iberildi. Bu görkeziji 2021-nji ýyl bilen deňeşdirilende takmynan 60 göterim ýokarydyr. Şol bir wagtyň özünde, «SOCAR Trading» kompaniýanyň halkara marketing we söwda mümkinçiliklerini ösdürip, Hazar sebitiniň energetika serişdelerini hem-de beýleki haryt akymlaryny dünýä energetika bazarlary bilen baglanyşdyrmagy dowam etdirýär. Bu ösüşler «SOCAR»-yň nebitgaz çykarylyşyny, gaýtadan işlemegi, paýlamagy, gaz üpjünçiligini, infrastruktura taslamalaryny we halkara söwdany özünde jemleýän köpugurly halkara energetika toparyna öwrülýändigini görkezýär.

«SOCAR»-yň halkara işiniň giňelýän döwründe Türkmenistan bilen hyzmatdaşlyk kompaniýa üçin strategik ähmiýete eýedir. 2023-nji ýylda «SOCAR»-yň Aşgabatda wekilhanasynyň açylmagy Türkmenistan we onuň milli energetika kompaniýalary bilen has ýakyn hyzmatdaşlygy ösdürmek üçin hemişelik institusional binýady döretdi. «SOCAR» «Türkmengaz» we «Türkmennebit» döwlet konsernleri bilen dialogy dowam etdirýär. Azerbaýjan bilen Türkmenistanyň arasyndaky ikitaraplaýyn gepleşiklerde bolsa Hazar deňzindäki energetika hyzmatdaşlygy, uglewodorod serişdelerini özleşdirmek, sebitara baglanyşyk we täze täjirçilik mümkinçilikleri ýaly ugurlara aýratyn üns berilýär. Bu hyzmatdaşlygyň esasy nyşanlarynyň biri Hazar deňzindäki «Dostluk» ýatagydyr. 2021-nji ýylyň ýanwar aýynda Azerbaýjan bilen Türkmenistan «Dostluk» uglewodorod ýatagyny bilelikde gözlemek we özleşdirmek barada hökümetara Özara düşünişmek hakynda Ähtnama gol çekdiler. Bu resminama köp ýyllaryň dowamynda çözülmän galan meseläni özara bähbitli hyzmatdaşlygyň täze ugruna öwrüp, iki ýurduň gatnaşyklarynyň taryhynda möhüm tapgyr boldy. Şondan bäri «Dostluk» Azerbaýjan bilen Türkmenistanyň gatnaşyklarynda täze çemeleşmäniň – Hazar deňzinde has ýakyn energetika hyzmatdaşlygyny ösdürmegiň nyşanlarynyň birine öwrüldi.

Bu hyzmatdaşlygyň ähmiýeti diňe bir deňiz ýatagy bilen çäklenmeýär. Azerbaýjanyň ösen eksport infrastrukturasynyň we Türkmenistanyň baý uglewodorod serişdeleriniň mümkinçilikleri energetika serişdelerini daşamak, söwda, üstaşyr geçirmek, tehnologiýalar, maýa goýumlar we durnukly ösüş ýaly ugurlarda hyzmatdaşlygy giňeltmek üçin amatly şertleri döredýär. Bu hyzmatdaşlygyň eýýäm amaly infrastruktura ölçegi hem bar. Azerbaýjanyň esasy nebit eksport ugry bolan Baku–Tbilisi–Jeýhan (BTC) nebit geçirijisi arkaly Azerbaýjanyň nebiti bilen bir hatarda Türkmenistandan we Gazagystandan iberilýän nebit hem daşalýar. Bu Hazarüsti infrastruktura hyzmatdaşlygynyň iş ýüzündäki mysallarynyň biridir. Şeýle hem Azerbaýjan we Türkmenistan Merkezi Aziýany, Hazar sebitini, Günorta Kawkazy, Türkiýäni we Ýewropa bazarlaryny birleşdirýän ulag we energetika geçelgelerinde möhüm orun eýeleýärler. Şunuň bilen baglylykda, iki ýurduň arasyndaky hyzmatdaşlygyň mundan beýläk-de ösdürilmegi diňe bir ikitaraplaýyn energetika gatnaşyklaryna däl, eýsem, Hazar sebitiniň ykdysady özara baglanyşygynyň pugtalandyrylmagyna hem goşant goşup biler.

«SOCAR»-yň Merkezi Aziýada, Ýewropada we halkara nebitgaz taslamalarynda barha giňeýän işjeňligi kompaniýanyň Hazar sebiti bilen dünýä energetika bazarlarynyň arasyndaky möhüm baglanyşdyryjy hökmünde ornuny pugtalandyrýar. Özbegistandaky işiniň giňeldilmegi kompaniýanyň Merkezi Aziýadaky ornuny güýçlendirýär. Italiýadaky ösüş, halkara nebitgaz taslamalaryna goýulýan maýa goýumlar we beýleki halkara energetika başlangyçlary bolsa «SOCAR»-yň dünýä bazaryndaky mümkinçiliklerini has-da giňeldýär. Türkmenistan üçin bu Hazar deňziniň goňşy döwletiniň sebitdäki baý tejribesini we barha giňeýän halkara iş mümkinçiliklerini özünde jemleýän energetika kompaniýasy bilen hyzmatdaşlygyň täze ugurlaryny ösdürmäge mümkinçilik berýär. Azerbaýjan üçin bolsa Türkmenistan bilen hyzmatdaşlygyň pugtalandyrylmagy Hazar sebitinde energetika integrasiýasynyň, özara baglanyşygyň we maýa goýum mümkinçilikleriniň ösdürilmegine goşant goşýar.

Şeýlelikde, iki ýurduň energetika hyzmatdaşlygy «OGT»-niň çäklerinde geçirilýän halkara ara alyp maslahatlaşmalarda hem barha möhüm orun eýeleýär.

«SOCAR»-yň «OGT 2026»-nyň Baş hyzmatdaşy hökmünde çykyş etmegi diňe bir kompaniýanyň forumdaky ýokary derejesini görkezmek bilen çäklenmeýär.

Bu hyzmatdaşlyk Hazar sebitiniň iki iri energetika öndürijisiniň arasyndaky gatnaşyklaryň energetika howpsuzlygy, maýa goýumlar, sebitara baglanyşyk, tehnologiýalar we durnukly ösüş ýaly giň gerimli ileri tutulýan ugurlar bilen barha ýakyndan utgaşýandygyny görkezýär.

«OGT 2026» «Energetika. Hyzmatdaşlyk. Ösüş» şygar astynda geçiriler. Maslahatyň gün tertibinde Türkmenistanyň energetika pudagyndaky iri maýa goýum mümkinçilikleri, «Galkynyş» gaz känini özleşdirmek, tebigy gazy eksport etmegiň ugurlaryny diwersifikasiýalaşdyrmak, Türkmenistan–Owganystan–Pakistan–Hindistan (TOPH) gaz geçirijisi, Hazar deňzindäki deňiz taslamalary, gazy gaýtadan işlemek, sanlylaşdyrmak, metan zyňyndylaryny azaltmak, pes uglerodly tehnologiýalar we halkara hyzmatdaşlygynyň täze görnüşleri esasy orun eýelär.

Çäräni «Türkmengaz» we «Türkmennebit» döwlet konsernleri hem-de «Türkmengeologiýa» döwlet korporasiýasy «Turkmen Energy Forum» bilen hyzmatdaşlykda guraýarlar.

«OGT»-niň geçen ýylky maslahatyna dünýäniň 70 ýurdundan 1 400-den gowrak wekil gatnaşdy. Bu görkeziji forumyň Merkezi Aziýanyň öňdebaryjy halkara energetika çäreleriniň biri hökmündäki ornuny has-da pugtalandyrdy.

«OGT 2026» ösüş depginini dowam etdirip, maýa goýum mümkinçiliklerine, öňdebaryjy tehnologiýalara, işewürlik gatnaşyklarynyň netijeli gurallaryna we anyk täjirçilik netijelerine has uly üns berer.

Azerbaýjan bilen Türkmenistanyň Hazar deňzindäki strategik hyzmatdaşlygynyň mundan beýläk-de çuňlaşmagy we «SOCAR»-yň halkara portfeliniň giňelmegi bilen, «OGT 2026» täze taslamalary, tehnologiýalary, maýa goýumlary we uzak möhletleýin hyzmatdaşlygy ilerletmek üçin möhüm halkara meýdança bolup hyzmat eder.