Ýurdumyzyň boks boýunça ýaşlar we ýetginjekler ýygyndysy Ispaniýanyň La Nusiýa şäherinde geçirilen «Boxam International Tournament 2026» halkara ýaryşynda 10 medal gazandylar. Ýaryşa 21 döwletden 246 türgen gatnaşdy, Türkmenistanyň ýygyndysyna bolsa 15, 17 we 19 ýaş toparlarynda 17 türgen wekilçilik etdi.

Başa-baş söweşiň netijeleri boýunça biziň ildeşlerimiz 3 altyn, 3 kümüş we 4 bürünç medal gazandylar.

Altyn medaly Daşoguz şäherindäki 6-njy orta mekdebiň 9-njy synp okuwçysy Arslan Rejepow (15 ýaşa çenli toparda, 44 kilograma çenli), 2-nji orta mekdebiň 10-njy synp okuwçysy Ýunus Maşaripow (17 ýaşa çenli toparda, 66 kilograma çenli) we Aşgabat şäherindäki 39-njy orta mekdebiň 11-nji synp okuwçysy Muhammetşarif Maşaripow (17 ýaşa çenli toparda, 75 kilograma çenli) eýelediler. Şeýle-de Ýunus Maşaripow 17 ýaşa çenli ýetginjekleriň arasynda iň ökde türgen hökmünde ýörite baýraga mynasyp boldy.

Kümüş medallar Türkmenabat şäherindäki 31-nji orta mekdebiň 9-njy synp okuwçysy Rustam Bahramowa (15 ýaşa çenli toparda, 46 kilograma çenli), Lebap welaýatynyň Çärjew etrabyndaky 2-nji orta mekdebiň 10-njy synp okuwçysy Atabek Hojaýewe (17 ýaşa çenli toparda, 52 kilograma çenli) we Şabat etrabyndaky 38-nji orta mekdebiň 11-nji synp okuwçysy Samir Saburowa (17 ýaşa çenli toparda, 80 kilograma çenli) gowşuryldy.

Bürünç medallara Aşgabat şäherindäki 132-nji ýöriteleşdirilen orta mekdebiň 11-nji synp okuwçysy Ysmaýyl Mollaýew (17 ýaşa çenli toparda, 46 kilograma çenli), 55-nji orta mekdebiň 11-nji synp okuwçysy Ezbermuhammet Myratdurdyýew (17 ýaşa çenli toparda, 63 kilograma çenli), Türkmen döwlet bedenterbiýe we sport institutynyň 1-nji ýyl talyby Ýazgeldi Amanmedow (19 ýaş toparda, 60 kilograma çenli) we Türkmen döwlet binagärlik-gurluşyk institutynyň 1-nji ýyl talyby Ysmaýyl Orazmyradow (19 ýaşa çenli toparda, 80 kilograma çenli) mynasyp boldular.