Russiýa Federasiýasynyň Tula oblastynyň Bunyrýowo şäherçesinde tamamlanan mekdep okuwçylarynyň arasynda küşt boýunça geçirilen XX Aziýa çempionatynda türkmen küştçüleri on medal gazandylar. Aziýanyň Küşt federasiýasynyň we Russiýanyň Küşt federasiýasynyň howandarlygynda geçirilen ýaryşa 12 ýurtdan 300-den gowrak küştçi gatnaşdy. 11 küştçüden ybarat bolan Türkmenistanyň ýygyndy topary 2 altyn, 5 kümüş we 3 bürünç medal gazanyp, baýraklaryň umumy sany boýunça 2019-njy ýylyň taryhy rekordyny gaýtalady.
Şol bir wagtyň özünde, çykyşlaryň netijeliligi boýunça bu gezekki ýaryş tutuş taryhyň dowamynda iň ýokary görkezijini görkezdi. Umumy medal sanawynda Türkmenistan 4-nji orny eýeledi. Gazanylan medallaryň umumy sany boýunça türkmen küştçüleri diňe Russiýadan (65 medal) we Gazagystandan (20 medal) yza galdylar hem-de Hindistandan (6 medal) öňe geçdiler. Munuň özi Türkmenistanyň ýygyndy toparynyň düzüminiň Gazagystanyň ýygyndysyndan iki esse kiçi bolandygyna (Gazagystanyň 22 türgenine garşy) garamazdan gazanyldy.
Ýaryşyň baş gahrymany Lebap welaýatynyň Dänew etrabyndaky 2-nji orta mekdebiň 2-nji synp okuwçysy, ýedi ýaşly Bahar Jumaýewa boldy (halkara reýtingi – 1552). Ol çempionatyň üç görnüşiniň ählisinde medal gazanmagy başardy.
Küşt oýnunyň nusgawy görnüşi boýunça Bahar 7 ýaşa çenli gyzlaryň arasynda 9 tapgyrda 6,5 utuk toplap, 14 gatnaşyjynyň arasynda bürünç medal gazandy. Ol diňe russiýaly Sofiýa Skripnikden we Kseniýa Denisowadan yza galdy. Bu üstünlik 2024-nji ýyldaky arakesmeden soň Türkmenistanyň ýygyndy toparyna küşt oýnunyň nusgawy görnüşi boýunça ýene-de münberden orun almagy üpjün etdi.
Küşt oýnunyň nusgawy görnüşi boýunça geçirilen ýaryşda beýleki türkmen küştçi gyzlary hem medallara ýakyn boldular: 9 ýaşa çenli gyzlaryň arasynda Bägül Jumaýewa goşmaça görkezijiler boýunça 4-nji orny eýeledi, Jennet Ýalkanowa bolsa 17 ýaşa çenli gyzlaryň arasynda iň güýçli bäş türgeniň hataryna girdi.
Küşt oýnunyň çalt (rapid) görnüşi boýunça ýaryş toparymyz üçin has-da netijeli boldy – küştçülerimiz 5 medal gazandylar:
Altyn medal: Bahar Jumaýewa (7 ýaşa çenli gyzlar, 9 tapgyrda 8 utuk) – ýaryşyň ilkinji tapgyrynda ýeňlişe sezewar bolandan soň, yzly-yzyna 8 gezek ýeňiş gazanyp, ajaýyp netije görkezdi.
Altyn medal: Hangeldi Myradow (7 ýaşa çenli oglanlar, 9 tapgyrda 7 utuk) – ilkinji tapgyrlardan başlap öňdeligi eýeledi, 8 duşuşygy ýeňlişsiz geçirdi we birinji ornuny saklamagy başardy.
Kümüş medal: Aýa Baýramowa (13 ýaşa çenli gyzlar, 7 utuk) – iki ýyl mundan ozal Bangkokda kümüş medal gazanyp, ýene-de ýeňşini gaýtalady.
Kümüş medal: Bägül Jumaýewa (9 ýaşa çenli gyzlar, 6,5 utuk) – jemleýji tapgyrda gazanan möhüm ýeňşi netijesinde medal gazandy.
Bürünç medal: Läle Wepaýewa (11 ýaşa çenli gyzlar, 6 utuk) – tutanýerlilik görkezip, soňky 5 oýunda 4,5 utuk toplady.
Küşt oýnunyň has çalt (blis) görnüşi boýunça ýaryşyň jemleýji güni Türkmenistanyň ýygyndy toparyna kiçi ýaş toparlarynda ýene-de 4 medal getirdi:
Kümüş medal: Bahar Jumaýewa (7 ýaşa çenli gyzlar, 7,5 utuk).
Kümüş medal: Bägül Jumaýewa (9 ýaşa çenli gyzlar, 7,5 utuk).
Kümüş medal: Çaryhekim Çaryýew (9 ýaşa çenli oglanlar, 7,5 utuk).
Bürünç medal: Hangeldi Myradow (7 ýaşa çenli oglanlar, 6,5 utuk).
Mekdep okuwçylarynyň arasyndaky küşt boýunça Aziýa çempionaty 2005-nji ýyldan bäri geçirilýär. Türkmenistanyň ýygyndy topary bu ýaryşa ilkinji gezek 2016-njy ýylda Tähranda gatnaşdy. Tutuş taryhynyň dowamynda ýygyndy toparymyz bäş gezek – 2016, 2019, 2023, 2024 we 2026-njy ýyllarda – doly düzümde gatnaşmak üçin daşary ýurda gitdiler we her gezek medallar bilen dolanyp geldiler.
Türkmenistanyň Küşt federasiýasynyň başlygy Wepa Mälikgulyýew ýygyndy toparyň çykyşynyň netijelerine şeýle teswir berdi:
– Türkmen ýaş küştçüleriniň gazanýan medallarynyň hiliniň ýokarlanmagy ýurdumyzda çagalar we ýetginjekleriň arasynda küşt sportunyň häzirki ösüş depgininiň kanunalaýyk netijesidir. Her ýyl çagalar halkara ýaryşlaryna, şol sanda resmi çempionatlara ýygy-ýygydan gatnaşýarlar. Türkmenistanyň özünde hem eýýäm ikinji ýyl yzly-yzyna halkara çagalar ýaryşlary, şol sanda iki aý mundan ozal geçirilen «Kids Expo Chess Cup» ýaryşy geçirilýär. Beýleki ýurtlardan gelen güýçli garşydaşlar bilen duşuşmak islendik derejedäki küştçi, aýratyn-da, ýaş küştçüler üçin iň gowy mekdepdir – diýdi.
