Türkmenistanyň Magtymguly adyndaky milli sazly drama teatrynyň zaly tomaşaçylardan dolydy. Aslynda, Tahyr Ataýewiň orkestriniň konsertlerinde mydama şeýle bolýar. Şol agşam orkestriň sazandalary tomaşaçylar bilen bilelikde meşhur blokbaster filmleri arkaly dünýäniň dürli künjeklerine aýdym-sazly syýahata çykdylar. Bu syýahatyň ýolbeledi bolsa iki gezek «Oskar», üç gezek «Globus» we dört gezek «Grammy» baýraklarynyň eýesi bolan nemes kompozitory Hans Zimmer boldy.
Sazly syýahat Bred Pittiň baş keşbi janlandyran «Formula-1» filmindäki sport-dramatik äheňli sazlar bilen başlandy. Çalt depginli sazlar we orkestriň ýerine ýetirmegindäki saz düzümleri tomaşaçylara aýratyn joşgun berdi. Filmiň sahnalary bilen utgaşdyrylan janly saz tomaşaçylaryň ünsüni bütinleý özüne çekdi.
Iňlis rysarçylyk romanlaryndan gözbaş alýan, Patyşa Arturyň britleri we sakslary birleşdirmegi baradaky rowaýat «Patyşa Artur» filminiň esasyny düzýär. Gylyçlaryň gynyndan çykarylyşy, çapyp barýan atlylar we şemalda pasyrdaýan baýdaklar ekranda peýda bolanda, zal ýene-de Hans Zimmeriň sazynyň jadysyna gaplandy.
Batyrlygyň senasy – italýan «Gladiator» filmini şeýle atlandyrmak bolar. Filmde namys we dönüklik, mertebe ugrunda göreş hem-de öz ýörelgeleriňe wepaly bolmak ýaly temalar beýan edilýär. Hans Zimmeriň täsirli, käte hasratly, käte bolsa ruhubelent sazlary tomaşaçylaryň duýgularyny has-da güýçlendirdi.
Tomaşaçylar dürli döwürlerde Ýer ýüzüniň dürli künjeklerine syýahat edip, batyrlyk we gaýduwsyzlyk, belent ahlak ýörelgeleri hem-de maksatlara ýetmek ýaly umumy gymmatlyklar bilen birleşýän täsin wakalar bilen tanyşdylar. Soňra bolsa «Dýuna» filminiň gahrymanlary bilen bilelikde äleme – düýşde görlen nätanyş planeta tarap ýola düşdüler. Bize nätanyş bolan bu planetanyň gurşawyny duýmak üçin täze sesler gerekdi. Tylla Saryýewa bolsa sesiniň kömegi bilen şeýle täsin saz kompozisiýasyny ýerine ýetirdi.
Agşamyň maksatnamasynda «Kung-fu Panda», «Gaýa», «Pearl Harbor», «Şerlok Holms», «Soňky samuraý», «Karib deňziniň garakçylary» we beýleki filmleriň sazlary ýaňlandy.
Konsertiň ahyrynda Tahyr Ataýew tomaşaçylara özüniň iň söýgüli multfilmini – «Arslan Patyşa» kompozisiýasyny hödürledi. Ol zaldaky tomaşaçylaryň arasynda bu ajaýyp filmiň muşdaklarynyň köpdügine umyt bildirdi.
Şeýlelikde, tomaşaçylar ekrandaky gahrymanlar bilen bilelikde jeňňele düşdüler. Patyşalyk maşgalasynda dünýä inen, ykbaly örän çylşyrymly synaglara sezewar boljak arslan çagasynyň dünýä inmegine şaýat boldular. Ol durmuşdaky ähli kynçylyklary ýeňip geçmegi we jeňňelde adalaty dikeltmegi başarýar.
Bu multfilmiň sazlaryny ýerine ýetirmekde orkestriň sazandalarynyň janly sazyna Arslan Öweniýazowyň ýolbaşçylygyndaky hor hem goşuldy.
Tomaşaçylaryň el çarpyşmalary, sowgat berlen güller we zaldan eşidilen jadyly «Sag boluň!» sözleri Hans Zimmeriň kino sazlarynyň tomaşaçylarda döreden täsiriniň aýdyň subutnamasy boldy.
