Ýagşygeldi Kakaýew adyndaky Halkara nebit we gaz uniwersitetinde «PETRONAS» kompaniýasynyň Tehnologiýa uniwersiteti (Malaýziýa) bilen bilelikde talyplar üçin uzak aralykdan okuw geçirilýär.
Malaýziýa uniwersitetiniň öňdebaryjy hünärmenleriniň nobatdaky okuw toplumy adaty nebit-himiýa abzallary üçin tehnologik işleri döwrebaplaşdyrmak sapaklaryny, ýöriteleşdirilen okuw talyplary üçin ýörite okuw sapaklar toplumyny öz içine alýar. Sanly tehnologiýalar we kiberhowpsuzlyk fakultetiniň talyplary üçin sapaklar taslama we modelleme işine bagyşlanýar.
Dürli hünär derejeli talyplar üçin häzir dowam edýän onlaýn sapaklar oktýabr aýynyndan bäri HNGI-niň Hasaplaýyş kompýuter merkezinde geçirilýär we şu aýyň ahyryna çenli dowam eder. Esasan-da, daşary ýurtly hyzmatdaşlaryň alyp barýan taýýarlyk okuwynyň esasy maksady «FreeCAD» we beýleki innowasion sanly programma üpjünçiligi bilen işlemek tärlerini özleşdirmekdir.
HNGI-niň wekilleriniň Ýewropa Bileleşiginiň «Erazmus+» maksatnamasynyň taslamalarynyň Halkara wirtual ýarmarkasyna gatnaşmagy halkara hyzmatdaşlygyň çäginde ýene bir waka boldy. Ol ýokary bilimi döwrebaplaşdyrmak we goldamak, ýaşlara bilim bermäge we olaryň hünär eýesi bolup ýetişmegine hil taýdan täze çemeleşmeleri guramak üçin, onlarça taslama başlangyçlar bilen tanyşdyran uzak aralykdan berilýän sapaklary öz içne aldy.
HNGI-iň dünýäniň birnäçe abraýly uniwersitetleri, iri halkara guramalar we kärhanalar bilen ylym-bilim pudagynda özara peýdaly, işjeň we netijeli hyzmatdaşlygy ýola goýandygy bellärliklidir. Uniwersitetde häzir geçirilýän çäreler Ýagşygeldi Kakaýew adyndaky HNGI bilen «PETRONAS Çarigali (Türkmenistan) Sdn Bhd» we «PETRONAS» kompaniýasynyň Tehnologiýa Uniwersitetiniň (Malaýziýa) arasynda baglaşylan özara düşünişmek Memorandumynyň, şeýle hem Ýewropa Bileleşiginiň «Erazmus+» maksatnamasynyň içinde HNGI bilen Ploeşti Nebit we gaz uniwersiteti (Rumyniýa) hyzmatdaşlyk şertnamasynyň çäginde guraldy.
HNGI we daşary ýurtly hyzmatdaşlaryň bilelikdäki ähli başlangyçlary ýokary bilim ulgamynda öňdebaryjy tejribäni özleşdirmek we ulanmak, häzirki zaman maglumat we aragatnaşyk tehnologiýalaryny, dünýä bilim giňişliginiň kämilleşdiren usullaryny we tejribelerini ornaşdyrmak hem öwrenmek akabasyna gönükdirilendir.
Anastasiýa Kasýanowa
