Bütindünýä Saglygy Goraýyş Guramasynyň Türkmenistandaky edarasy BMG-niň Hemişelik utgaşdyryjysynyň edarasy bilen bilelikde Myrat Garryýew adyndaky Türkmenistanyň Döwlet lukmançylyk uniwersitetiniň talyplary üçin okuw sapagy geçirdi.
Ýurtdumyzda we sebitde Durnukly ösüş maksatlarynyň durmuşa geçirilişine goldaw bermek maksady bilen guralan bu okuw sapagy Türkmenistanyň BMG-ä agzalygynyň 30 ýyllygyna bagyşlanýar. Okuw sapagyň dowamynda talyplar Durnukly ösüş maksatlarynyň her birinde saglygyň möhüm ornuny ara alyp maslahatlaşdylar. Sagdyn durmuş ýörelgelerini wagyz etmek we islendik ýaşdaky ähli adamlaryň abadançylygyna ýardam etmek durnukly ösüşiň möhüm bölekleridir. Ünsi saglygy goraýyş ulgamlaryny has gowy maliýeleşdirmäge, arassaçylyk we gigiýenany gowulandyrmaga we lukman elýeterliligini artdyrmaga jemlemek arkaly millionlarça adamyň janyny halas etmekde ep-esli öňegidişlik gazanmak bolar.
Talyplar, şeýle hem, geljek bäş ýylda ileri tutuljak ugurlary kesgitleýän 2020 – 2025-nji ýyllar üçin Ýewropa iş Maksatnamasy bilen tanyşdylar. Onda Bütindünýä Saglygy Goraýyş Guramasynyň Ýewropa sebitleýin edarasynyň agza ýurtlaryň saglygy goraýyş edaralaryna bu wezipeleriň her ýurtda we bilelikde sebitde ýerine ýetirilmegine nähili kömek edip biljekdigi barada düşünje beýan edilýär.
